КРАЕВЕДЕНИЙ КУЧЕМЫШТЕ УВЕР ЙОГЫН

Марлат чын возыман

Йылме комиссий

Марлат чын возыман

Эртыше арняште Марий Элын кугыжаныш йылмыже-влак шотышто правительственный комиссийын черетан заседанийыштыже шочмо йылмына дене кылдалтше икмыняр йодышым ончымо.

Тӱп калык-влакын йылмыштлан пӧлеклалтше тӱнямбал луияшым палемдыме жапыште республикыштына 2022-2032 ийлан пеҥгыдемдыме паша план шукталтме нерген Марий Элын тӱвыра, савыктыш да калык-влакын пашашт шотышто министр К.Иванов палдарен. Тудым илышыш пуртымаште палемдыме министерстве деч посна тыгак Образований да науко министерстве, МарНИИЯЛИ да МарГУ вуйын шогат.

Тений кеҥыжым икмыняр корнывалне илем ден эҥер-влакын лӱмыштым марлаҥден возымо указательым вераҥдыме деч вара ятыр йоҥылыш шинчашке логалын. Августышто соцкылыште «Указатель-влак йоҥылыш деч посна» флешмобым увертарыме ыле. Регионым виктарыме рӱдерым вуйлатыше В.Трифонов тудым иктешлен каласыш: «Кугыжаныш кучемын сообществылаштыже 165 публикаций лийын. Чылаже 23 тӱрлӧ замечаний пурен. Эн шукыжо – лу – Советский районысо шотышто, Звенигово ден Шернур районласе – кумыт дене, Курыкмарий ден Морко районласе – кокыт дене, Йошкар-Ола, Кужэҥер, Марий Турек районласе – икте дене.

Комиссий председатель, Марий Эл правительстве вуйлатышын икымше алмаштышыже М.Васютинын палемдымыж почеш, эртыше кечылаште эше ик серыш пурен: Волжский районысо Яльчик кумыдыкышто марлаҥдыме ик указателят уке, тидым тӧрлыман. Тӱҥ шотышто йоҥылыш-влак марий шрифтым кучылтдымылан кӧра лийыныт. Нуным тачысе марий орфографий нормылан келыштараш да 2023 ий апрель марте вашталтен шукташ темлыме.

Российыште марий-влакын тӱшкан илыме кундемла дене марий йылмым арален да вияҥден шогымо шотышто кыл нерген республикысе Марий тӱвыра рӱдер вуйлатыше Н.Пушкина радамын каласкалыш. Тиде паша, чынже денак, эреак да шуко ышталтеш. Ятыр мероприятийыже нерген газетыштына возенак шогена.

Кажне заседанийыштыже Марий Эл правительствын мер калыклан кӱлешан уверым вераҥдыме годым йылме-влакым кучылтмо нерген положенийже шотышто пунчалын (тудо 2010 ийыштак лектын) шукталмыжым тергыме амал дене муниципальный ообразованийла гыч отчетым ыштат. Тиде гана Марий Турек ден Звенигово район-влак мутым кученыт. Паша шуко ышталтеш гынат, кӱлешан информацийым марий йылме денат вераҥдыме шотышто йодыш уло. Комиссий лӱм дене верысе самоуправлений-влаклан тидым угыч терген лекташ темлыме. Муниципальный образований ден ола округлашке М.Ипакован «Наименования государственных органов, организаций, учреждений и предприятий Республики Марий Эл с переводом на марийский язык» справочный пособийжын PDF-форматшым колташ пунчалме. А Звенигово районысо миниципальный образованийлан «Звениговская неделя»  газетыште марий йылме дене вкладышым лукташ тӱҥалаш темлыме.

Комиссий тыгак 2023 ийлан паша планым пеҥгыдемден.

С.Пехметова

Опубликовать в Одноклассники

Добавить комментарий