Мемнан республикыш «Национальность.ru» федерал проектын оператор группыжо толын каен.
Тудо марий калыкын тӱвыраже да йӱлаже дене палдарыше фильмым ямдыла. Тенийсе идалык мучко нуно Российыште илыше 190 наре калыкын тӱвыраже дене палдарыше 50 наре видероликым возышаш улыт. Ты проектшым Калык-влакын пашашт шотышто федерал агентстве «Институт развития интернета» НКО да «Росвидео продакшн» ООО дене пырля илышыш шыҥдарат. Марий Элыште войзымо видеосюжет-влакын геройышт радамыш онаеҥым, апшатым, шӱвырым ыштыше мастарым, тӱрызым, поварым, мӱкш ончышым пуртеныт. Шанче могырым погымо материалым В.М.Васильев лӱмеш МарНИИЯЛИ-н да Марий кугыжаныш университетын пашаеҥже-влак пойдареныт. Марий калыкын муро да куштымаш усталыкыштым «Марий памаш» калык фольклор-этнографий, кӱсле дене шоктышо «Чинчывий» ансамбль-влак почын пуэныт. Видеороликым инернетыште июнь мучаште ончаш лиеш.
С.Носова
