Марий парк
Марий парк койын калык каныме верыш савырна, тыгодым марий сыным налеш. Йошкар-Ола администрацийын архитектур да градостроений управленийжын уверже почеш, кызыт кажне район нерген каласкалыше стендым вераҥдат. Чылаже 17 стенд лиеш. Нуным марий тӱр сӧрастара. Йошкар-Олан стендше ямде манаш лиеш. Тушто рӱдолан «капкаже-влак» – кӱрньыгорно да автовокзал-влак, аэропорт – ончыкталтыныт. Чарлан кузе шочмыжо, марий калык, Йошкар-Олам йӧраташ таратыше амал-влак нерген текстым возымо, тыштак зданий, скульптур да памятник-влакын фотосӱретышт лийыт.
Стендыш вераҥдышаш материалыште чылажат чын лийже манын, Йошкар-Ола историй тоштерыште, Марий Эл тӱвыра, печать да калык-влакын пашашт шотышто министерствыште, Йылмым, сылнымутым да историйым шымлыше марий институтышто да Мер Каҥашыште тергаш тӱҥалыт.
– «Марий паркыште – тыйын лӱмет!» акцийым увертаренна. Йоча-влак, туныктышыда але ачада, изида дене пырля шырчык омартам ыштен, «Шындер шырчык» клубыш, Йошкар-Ола, Гагарин проспек, 8-ше пӧрт адрес почеш 310-шо пӧлемыш кондыза. Тендан омартадам Марий паркысе пушеҥгылашке сакена. Шкендан лӱмдам сералтыза, тыге те историеш кодыда, – ӱжын ойла Мер Каҥаш вуйлатышын оналмашыже Валерий Мочаев.
Тиде акций кайыме нерген «Ямде лий» газет тыге увертара: 13 мартыште ныл кайык пӧртым конденыт. Советский посёлко гыч 10 ияш Андрей Шабалин ден 5 ияш Макар Яманаев ачашт дене пырля ямдыленыт. Вес кок шырчык омартам Йошкар-Оласе 28-ше лицейыште тунемше Виктория (1-ше класс) ден Артемий Бусыгинмыт (4-ше класс) ачашт да кочашт полшымо дене ыштеныт.
Акций 27 март марте шуйна. Жап эше уло, пашалан чулымын пижса!
«Оласе средам йӧнаным ыштымаш» федеральный проект почеш шочшо Марий парк чонан пӱртӱс семынак теле деч вара помыжалтеш.
Л.СЕМЕНОВА
Фотом Йошкар-Ола администрацийын сайтше гыч налме
