Конференций
Марий йылме нерген – тӱнямбал кӱкшытыштӧ
5-7 июльышто Москваште тӱнямбал кӱкшытан «Шочмо йылме-влакын тӱнямбал поянлыкышт: аралаш да йӧраташ. Тӱп калык-шамычын йылмыштым аралымын контекстше, политике да практике» конференций лийын.
Тудо 2022-2023 ийлаште Россий Федерацийыште тӱп калык-влакын йылмыштлан пӧлеклалтше тӱнямбал пайремлан лу ий теммым палемдыме кышкарыште да ЮНЕСКО-н «Увер чылалан» правительстве-влак кокласе программыже почеш эртаралтын. Конференций элыштына национальный политике аланыште ик эн тӱҥ мероприятий семын шотлалтын да тӱп калык-влакын йылмыштым арален вияҥдыме шотышто россий кугыжанышын кугу опытшым кумдан шараш виктаралтын.
Мероприятийыште 50 утла эл гыч тӱнямбал кӱкшытан эксперт-влак пашам ыштеныт.Участник-влак шочмо йылмым аралыме да тудым вияҥдыме дене кылдалтше тачысе йодышым каҥашеныт, доклад-влакым колыштыныт.
Марий Эл гыч конференцийыште Йылмым, литературым да историйым научнын шымлыше В.М.Васильев лӱмеш марий институтын вӱдышӧ шанче пашаеҥ Ольга Орлова, шанче пашаеҥже Андрей Чемышев, С. Чавайн лӱмеш калыкле книгагудын директоржо Ирина Щеглова да Мер Каҥаш вуйверын еҥже Галина Ширяева лийыныт. Нуно республикыштына шочмо йылме вияҥме шотышто сӱрет дене палдареныт, киберкумдыкышто марий йылмын сеҥымашыже да нелылыкше дене кылдалтше докладым ыштеныт.
Конференцийым Национальность-влак паша шотышто федерал агентстве (ФАДН) «Увер чылалан» ЮНЕСКО программын Россий комитетше дене пырля эртареныт.
Г.Кожевникова
Снимкыште: Галина Ширяева, ФАДН-ын пашаеҥже Ксения Лушкина (марий ӱдыр) да Андрей Чемышев
Фотмо А.Чемышевын соцкылысе лаштыкше гыч налме
