Марий кугыжаныш университетлан – 100 миллион теҥге кугытан грант.
«Приоритет-2030» программыш ушнаш йодмашым пуышо университет-влакым аклыме пашам иктешлыме. Тений шке статусшым Россий Федерацийысе 56 субъект гыч 142 вуз пеҥгыдемден, нунын кокла гыч иктыже – Марий кугыжаныш университет.
2025 ий гыч «Приоритет-2030» программын тӱҥ шонымашыже – технологий могырым ончылно лияш. Вуз-участник-влак 2025-2030 ийлан да 2036 ий марте илышыш пуртышаш кумыт деч шуко огыл технологий проектым ямдыленыт. Марий кугыжаныш университетын нуно тыгай улыт: «Ончыкылыкын биомедицине да ветеринар технологийже-влак», «Электроникылан изи тоннан химий да у материал-влак», а кумшыжо космический съёмко технологийым вияҥдыме да дистанций йӧн дене мландым зондироватлыме радиолокаций данный-влак негызеш геоинформаций продуктым ямдылыме дене кылдалтын.
Марий Элым вуйлатыше Юрий Зайцев палемден: Марий кугыжаныш университет ончыл научный разработко шотышто лидерлан шотлалтеш.
« Марий кугыжаныш университет – «Приоритет-2030» программе кышкарыште грантым сеҥен налше-влак коклаште. Ме тудын дене кугешнена. Тидыже мемнан вузын кугу кӱкшытан образованийым пуымыжым да научный тӱҥалтышыжым пеҥгыдемда. Программе почеш ойырымо средства вузын амбициян проектше-шамычым илышыш пурташ, биомедицине да ветеринар технологийлаште ончыко ошкылым ышташ да мемнан республиклан элнан научный сообществыштыже да ӧрдыжыштат ончыл радамыште лияш йӧным ышта манын ӱшанем», – каласен регионым вуйлатыше.
Россий Федераций Науко да кӱшыл образований министр Валерий Фальков «Приоритет-2030» программым вуз-влаклан кугу да кӱлешан ӱжмашын йыжыҥже семын палемден. «Кажне участникын темлыме проектшым ончен, ме университетын уло пашажлан акым пуэнна. Поснак куанен палемдыман: шке вузыштым аралымашке регионым вуйлатыше, тыгак федеральный министерств гыч еҥ-влак шкак толыныт. Кажне командыште топ-менеджер, кугу компаний-влакын – университет-влакын партнёрыштын – вуйлатышышт лийыныт. Чыла тиде программын да вуз-влакын элнан экономикыштыже кугу рольыштым ончыкта», – каласен тудо.
Ушештарена, «Приоритет-2030» программын тӱҥ шонымашыже – 2030 ий марте Россий Федерацийын вияҥме национальный цельышкыже шуаш университет-влакын ресурсыштым иктеш ушаш, вуз-шамычын научный да образовательный куатыштым вияҥдаш, тыгак регион-влакым социальный да экономике могырым вияҥдымашке кӱшыл образованийым пуышо организацийлам ушаш.
Программе 2021 ий гыч илышыш пурталтеш, тений гыч тудо – «Молодёжь да йоча-влак» у национальный проект кышкарыште.
Марий Элым вуйлатышын пресс-службыжын уверже негызеш Галина Кожевникова ямдылен.
Фотом Марий кугыжаныш университетын соцкылысе лаштыкше гыч налме
