Марий Эл культурын сулло пашаеҥже, писатель Валентин Осипов-Ярча сылнымут костенечым ямдылен: «Эх, Рая, Раисаж-а-ат…» книгаже савыкталтын.
Ушештарена, тыгаяк лӱман повестьше 2022 ийыште «Марий Эл» газетнан лаштыкыштыже номер гыч номерыш печатлалте. Тунам рашеме, произведений лудшылан чот келшен, молан манаш гын, южо районышто да ялыште повестьым савыктыман газет сурт гыч суртыш коштмо увер редакцийышкат шоктен. Кузе уке гын?! Вет тӱҥ геройжо – Раисия Данилова: чолга радиожурналист, уста мурызо, шке шонымашышжым туран луктын каласыше, марий мер толкынышто шочмо калыкшын волгыдо ончыкылыко верч тавадаҥ шогышо марий талешке-ӱдырамаш. Но… 2021 ий сӱрем тылзын коло кокымшо кечынже Раисия Михайловнан, ош йӱксыш савырнен, кававомышыш чоҥештен кӱзымыжӧ да ош тӱня дене чеверласымыже чумыр марий тӱням сургалтарыш. Тудо ийынак шочмо Юлсер кундемыштыже лӱмешыже чапкӱм шогалтышт, сценым почыч. Теве ынде вес сынан курымашлык шарныктыш – книга.
Книгашке «Эх, Рая, Раисаж-а-ат…» повесть, авторын тукымшӱжарже Раисия Андреевнан каласкалымыж почеш возымо «Шелше отыза» мистико-эротике шӱлышан роман да «Чоным почын, шӱлыкаҥын шонкалымаш» философий шӱлышан публицистике савыктыш пурталтыныт. Кум произведенийыштыжат автор ожнысым шарналта, тачысе илышым шергалеш. В.Осипов-Ярча оҥай, да тыгодымак чоным вургыжтарыше содержанийым чоҥымыж да мутйогын поянлыкым мастарын кучылтмыж дене лудшын кумылжым савыра.
Комышто вераҥдыме фотографий гыч марий тувырым чийыше Раисия Данилова шыргыжын онча, пуйто кажныланна каласынеже: мыйым тыгайым шарнен кодса. Чаманен ойлена, мурысыжла «илаш кӱлеш ыле…Вет кайымеке пӧртылаш ок лий…»
Книгам «Марий Эл» газет» ООО ямдылен луктын. Редакцийыш толын налаш лиеш, але йодмыда почеш намиен пуэна.
Л.СЕМЕНОВА
