«Россий» тӱнямбал выставке-форумыш 10 миллион еҥ миен.
Тиде айдеме Ярославль ола гыч Константин Панфилов лийын. Тудо выставкыш Екатерина пелашыж дене пырля миен.
«Россий» выставкын дирекцийже, «Росатом» Госкорпораций пӧръеҥлан Мурманскыш миен толаш сертификатым кучыктеныт. Тиде сертификат дене вате-марий «Ленин» атом ледоколым ужын кертыт. Тыгак «Атомфлот» универсальный ледоколыш да Кольский атомный электростанцийыш экскурсий дене миен толын кертыт.
— «Россий» выставкыш икымше гана миенна. А тушто мыланна пиал шыргыжалын. Ме моткоч куаненна, — каласен Константин Панфилов.
