Эртыше кечылаште Йошкар-Ола да Марий митрополит Иоаннлан 65 ий темын.
«Ынде 30 ий утла, Марий Элысе калыклан юмын полышыжо лийже манын, Тыланда ӱшанен пуымо пашаште, еҥ-влакын чоныштышт Христосын чынжылан ӱшан ылыжше манын тыршеда… Мый Тыланда кумалме гоч кап-кыл пеҥгыдылыкым, чон ласкалыкым, Господьын кугу полышыжым да ончыкыжымат Святой православийлан тыршыме верч архирей пашаштыда сай лектышым тыланем», – теве тыге саламлен тудым Моско да Уло Русьын патриархше Кирилл шочмо кечыж дене.
Тыглай илышыште тудо – Иван Иванович Тимофеев. Озаҥыште, шуко шочшан, православийлан кумылан ешыште кушшо рвезе, кыдалаш школым пытарымеке, Псково-Печерский монастырьыш послушник семын каен. Шкенжын шарналтымыж почеш, тушто могай гына послушанийым шукташыже логалын огыл!… Но юмылавн служитлыме корныш шогалмеке, монах лияш шонышо рвезе мӧнгеш савырнен кертын огыл. Моско духовный семнарийым, вара туштак духовный академийым тунем лектын, богословийын кандидатше степеньым налын.
Вара тудым Озаҥ епархийыш колтеныт. А 2017 ийыште руш православный черкын Синодшо Марий кундемыште посна митрополийым ышташ пунчалын. Сандене тудым Йошкар-Ола да Марий архиепископ семын пеҥгыдемденыт.
Тудо пагыт гыч епархий пеҥгыдын йол ӱмбаке шогалын манын кертына. Мутат уке, тиде Иоаннын тыршымашыже. Монах саным налше еҥ ешан, шочшан лийын ок керт. Но ик интервьюшто тудо тыгерак каласен: «Кундемыштына улшо кажне черке – икшывем гай».
2017 ийыште 4 ноябрьыште тудым патриарх Кирилл митрополитын санышкыже кусарен. Черке йӱла верч тыршымыжлан Иоанным руш православный черке икмыняр гана палемден: Сергий Радонежскийын, Серафим Саровскийын, Святитель Иннокентийын, Святой Даниил Московскийын II степенян орден-влак дене. «За Заслуги перед Марий Эл» II степенян орденымат тудо сулен.
Ик пресс-конференцийыште православный еҥ шочмо кечым кузе палемдышаш нерген тудын вашмутшо тыгайрак ыле: шочмо кече – тиде айдемын мыняр ийготыш шумым ончыктышо палыже веле. Сандене тудын тынеш пурымо годым налме лӱмжын кечыжым уларак палемдаш шотлан толеш. Но йӱын-кочкын, веселитлен монь огыл, а кумалын, чоным эрыктен да лыпландарен. Марий митрополит дене мутым вашталтыме годым шкежат ласкалыкым налат. Тудо моткоч тыматле койышан, пуйто вес еҥым вошт ужеш, шижеш, умыла. Кӱлмӧ годым пайдале каҥашым пуэн мошта. Шкежат моткоч кумда тӱня шинчаончалтышан айдеме. Мыскарам умылен да тудым ыштен мошта. Пеш порын пӱшкылынат кертеш.
Поро йӱла почеш, шочмо кечынже марий митрополит Ежово селасе Мироносицкий ӱдырамаш монастырьыште литургийым эртарен.
С.Носова
Снимкыште: Йошкар-Ола да Марий митрополит Иоанн.
