УВЕР ЙОГЫН

Лӱдаш нимолан

Президент Владимир Путинын россий войскан Украиныште военный операцийым эртарымыж нерген пунчалым лукмыж деч вара Касвел эл-влак Россий ваштареш санкцийым ыштеныт, тыгодым «Сбербанк»   финанс тӧнежымат ӧрдыжеш коден огытыл. Тидыже, поснак США-н, Европын да Великобританийын санкцийыш логалше банк-влакын активыштым «кылмыктыме» – кугыжанышын пайдажлан конфисковатлыме – нерген увертарымышт деч вара, калыкым чот лӱдыктыш, да тудо шке оксажым банкомат да кассе гоч налаш лупшалте. Тӱрлӧ увер почеш, россиян-шамыч 25 февральыште гына банкла гыч 1,4 триллион теҥгем кидышкышт налыныт. Тыгайже айдеме тукымын историйыштыже лийынжат огыл.

Чыла тидым шотыш налын, 28 февральыште Рӱдӧ банк калыкын вкладшым арален кодашлан идалыкаш ставкым 9,5 гыч 20 процент марте кугемден. «Сбербанк» компаний официальный сайтше, мобильный приложенийже да СМИ-влак гоч публичный заявленийым ыштен. Финанс тӧнеж элыштына илыше кажне еҥым шкем ласкан кучаш да тургыжланаш огыл ӱжын.

«Сбербанк» кредит организацийын палемдымыж почеш, компанийлан кумыкталташ нимогай лӱдыкшӧ да амал уке, молан манаш гын санкций ваштареш шогаш ликвидность ден ресурс ситышын улыт. Чыла финанс услуго ончычсо семынак тичмашын да чарак деч посна пуалтеш. Калыкын наличный оксам кидыш налмыжлан кӧра банкомат-влак писын ярсат гынат, элыштына средства ситышын уло. Но, мутлан, кугу окса эрлалан але вес кечылан кӱлеш гын, тудым ончычсо семынак отделенийын кассыж гоч заказатлаш лиеш. Но тыге ышташ кӱлешлыкше укеат, вет теҥге, доллар, евро да валютын моло видше дене чыла операций ончычсо семынак эртаралтеш.

Касвел эл-влакын санкцийышт Сбербанкым САРТА радамыш пуртымо дене кылдалтын, сандене чыла американ финанс институт тиде кредит организацийын корреспондент счётшо-шамычым 30 кече жапыште петырышаш. Тыгодым банкын активше, а тиде 750 миллиард наре доллар, огеш «кылмыкталт», сандене банк ден тудын клиентше-влак тудын дене тичмашын пайдаланен кертыт. Санкций дене келшышын, чыла американ организаций ден компанийлан тиде банк дене кылым ышташ лиеш. Иктешлаш гын, шуко еҥын шонымыж почеш, сӱрет тынаржак плока огыл.

                                                                                           М.ИВАНОВА                                                                                                                                

 

 

Опубликовать в Одноклассники

Добавить комментарий