31 мартыште Йошкар-Оласе Самырык-влакын полатыштышт Марий Элын «ЛизаАлерт» отрядше йомшо айдемым кычалме да утарыме пашашке ушнаш кумылаҥше еҥ-влак дене вашлийын.
Погынымашке отрядын пашажым шукертак эскерыше, тыгодымак тудлан полшаш кумылаҥше 11 еҥ толын, да эше нылытын онлайн-вашлиймашке ушненыт. Тиде регионыштына у коронавирус инфекцийын шарлымыжлан кöра шке жапыштыже пуртымо ятыр чаракым кораҥдыме деч вара у да онлайн-лекцийым эртыше еҥ-шамыч дене икымше очный вашлиймаш лийын.
Тÿрлö йогын дене пашам ыштыше 10 «шоҥго» (отрядыште шукертак пашам ыштыше-влакым мыскара йöре тыге маныт) у еҥ-шамычым отрядын тÿҥ правил ден корныжо-шамыч, тыгак опытышт дене палдареныт, йомшо еҥым кычалме пашаште доброволецын лачшымак мо дене полшен кертмыж нерген каласкаленыт, тÿрлö йодышлан вашештеныт.
«ЛизаАлерт» отрядыш йомшо айдемым кычал муаш кÿлмö нерген увер пурымеке, вашлиймашке толшо 11 еҥ поро да суапле пашашке кызытак ушнен кертеш, вет нуно ынде отрядын доброволецше улыт.
М.ИВАНОВА
