Конкурс!
Пагалыме лудшына-влак, 2 февральыште «Сурт-пече» газетын «Озавате» лаштыкыштыже «А мый тыгайым ямдылем!» конкурсым увертаренна ыле. Ушештарена: ешыштыда ямдылыме фирменный манме кочкышдан але йӧратыме сийдан, моло рецептым возаш да, тудын фотографийжым ыштен, mari-olma@mail.ru электрон адресыш але ВКонтакте соцкылыште «Сурт-пече» газетын, тыгак мыйын тусо лаштыкыш колташ лиеш. Эн ойыртемалтшыштым «Озавате» лаштыкыште савыктена. Сеҥышылан пӧлекым кучыктена. Вучена!
Пайдале каҥаш
Таче ме кочкаш шолтымо, сийым ямдылыме годым палаш кӱлшӧ икмыняр ой-каҥашым темлена.
• «Оливье» салатлан пакчасаскам шолтымеке, кӱйшӧ пареҥгым кок шагатлан холодильникыш пыштеда, а вара пӱчкедеда гын, тудо пижедылше огеш лий.
• Вӱдыш изи лимон падырашым але ик изи совла содым пыштеда гын, тыгай вӱдыштӧ шолтымо муно куштылгынрак эрыкталтеш.
• Жаритлаш ямдылыме пареҥгым эрыктымеке да тыгыдемдымеке, кок минут наре шокшо вӱдыштӧ кучеда гын, тудо писынрак кӱэш.
• Ложашан, кодшо руашан атым йӱштӧ вӱд дене гына мушман, уке гын шокшо вӱдыштӧ тудо кӱйын шичме гай лиеш да мушкаш нелырак лиеш.
• Кочкаш шолтымо годым вургемышкыда кушкыл, ушкал але вес тӱрлӧ ӱй логалеш гын, тудым пондашым нӱжымӧ шоҥ дене куштылгын мушкын колтен кертыда.
Нине ой-каҥаш-влак гын лишыл жапыште ик эн чот кӱлеш лийыт. Молан манаш гын, арня утларак гыч ик эн вучымо да йӧратыме Кугече пайремна шуэш. А тудлан ме икмыняр жап ончычак ямдылаташ, чыла вере арулыкым пурташ, эрыкташ, окнам, окна янакым мушкаш тӱҥалына.
• 1 литр вӱдыш ик кугу совла крахмалым пышташ, сайын лугаш да тидын дене окнам мушкаш гын, окна янда эсогыл йылгыжаш тӱҥалеш.
• 1 кугу совла содым, тынарак вургем мушмо порошокым налза, изишак вӱдым ешарыза, сайын лугыза. Ынде тиде вартыш дене кухньышто ӱй палым куштылгын мушкын колтен, амыргыше окна янакым нимогай нелылык деч посна ошемден кертыда.
Л.Камалетдинова
Авторын фотожо
