16 -20 июльышто республикыштына Россий кӱкшытан XVI Марий самырык тукым слёт лиеш. Ты гана калыкнан ик эн чолга ӱдыр-рвезыже-влакым Курыкмарий Микрак села вашлияш ямдылалтеш.
Участник-влак икымше кечын Йошкар-Олаш погынат да варажым Козьмодемьянск олаш кудалыт. Слётым торжественно почмаш лач тушто верланыше кава йымалсе этнографий тоштерыште 12 шагатлан лиеш. Тоштер дене палыме лиймеке, чыланат Микрак селаш тарванат. Ты кечынак верысе модельный тӱвыра рӱдерыште слётын почётан уна-влак дене вашлиймаш лиеш, тидын деч вара кыдалаш школышто мероприятийын программыже дене палдарат, а кастене отряд-влак марий йылме, марий калыкнан историйже, еш да социальный проектым ыштыме дене кылдлтше тунемме занятийла еда шелалтыт.
Кокымшо кечын ӱдыр-рвезе-влак студийлаште (нуныжо адакат марий йылмылан, ешлан, тукымвожлан, социальный проектлан пӧлеклалтыт) пашам ыштат. Тыгак ты кечын нуным «Ныл тошкалтыш» лекций, «Мый чыла ыштен моштем» калык кидпаша мастарлык школ, «Марий калык историй» квиз да тунемме занятий ден оҥай вашлиймаш-шамыч вучат.
Слётын кумшо да нылымше кечылаштыже слётыш погынышо-влак верысе кундемыш экскурсий дене лектыт, Марий Элын шарныктышыже-влак дене палдарыше презентаций лиеш. Тыгак нуным верысе усталык коллективын концертше, Санкт-Петербург ден Ленинград областьласе марий землячествын еҥже-влак дене вашлиймаш вуча, а кастене – курымарий эстраде мурызо-влак дене кас.
Слётын пытартыш кечыже эшеат оҥай лийшаш: участник-влак Юл эҥерым паром дене ийын вончат да Шереметьев замкыш экскурсий дене каят.
Г.Кожевникова
М.Скобелевын фотожо, 2022 ий
