1 октябрь – Музыкын тӱнямбал кечыже. Тудо кумылым нӧлта, шортара, чоншижмашым ылыжта, шонаш тарата… Музык мемнан чоннам эмла.
Марий профессионал семмастарна-влак, шочмо кундемнам, пашаче калыкнам, мотор пӱртӱсым моктен, ятыр мурым, семым возеныт. Кажныже кугешныме кумылым шочыкта.
Те, йолташ-влак, могай музыкым колышташ кумылан улыда? Музык – мо тыланда?
Эдуард ИМАНАЕВ, «Марий книга издательстве» савыктыш пӧртын директоржо, Марий Эл Кугыжаныш Погынын депутатше:
– Мут уш-акыл поянлык дене пашам ышташ кӱлешан гын, музык – шӱм-чоныш корным почшо кыл. Сандене илыш йыжыҥыште чыла тӱрлӧ сем йогынжат пайдале. Тӱҥжӧ – тудо чон гыч лекше лийже, шке сылнылыкше дене ойыртемалтше. Тыгай сынан музыкым кеч-могай жанрыштат колышташ кумылан улам, колыштам да чонем куандарем.
Надежда ПЕТРОВА, Талантан йоча-влаклан регионысо «Волгенче» рӱдерын туныктышо-воспитательже:
– Сылне муро, сылне сем – илыш вий. Пашам кыртмен ышташ тарата. Илышыште тӱрлыжат – сайжат, осалжат – лиедат, тыгай годым чонем ныжылге, шыма марий да руш муро лыпландара, кумылым нӧлта. Марий Эл Радиом чон вургыж колыштам. Ончычсо (ретро) марий муро-влак виян улыт, поснак Майя Романован, Андрей Андриановын, Светлана Сушкинан да эше икмыняр моло мурызын, артистын мурымышт келшат.
Мыйын пашам самырык тукым дене кылдалтше, а йоча-влак дене эреак чолга, поро да нуным умылен моштышо лийман. Тыштат муро полша, илышем куштылемда. Тудо илышлан йывыртен, икте-весым пагален, нелым-йӧсым сеҥен илаш кумылаҥда. Тыгодым сай, чонеш логалше мурым колышташ да муралташ келша.
Туныктышо-влакым пайрем дене шокшын саламлем!
Ирина КУБЕКОВА, М.Шкетан лӱмеш Марий национальный театрын артистше:
– Утларакше йоча-шамыч дене нунылан келшыше мурым колыштам. А кочкаш ямдылыме годым кухньышто тӱрлӧ молитвам, псалтырьым чӱктем. Автомашина дене кудалме годым радио кутыра.
Икшывем-влак дене шукыж годым классический музыкым колыштына. Шкетын пӱртӱсыштӧ кайык мурым, шыве-шыве пуалше мардежым, йыргыктен йогышо вӱдым ончаш да колышташ келша.
Музык – илышын вӱршерже. Кумылем могай, тугай музыкым колыштам.
Аида МАКОВА, республикын Тӱвыра, савыктыш да калык-влакын пашашт шотышто министерствыжын печать да тӱшка коммуникаций пӧлкажым вуйлатыше:
– Тӱрлӧ музыкым колышташ келша, классический гыч кызытсе жапысе марте. «МЭТР FM» радиостанцийым 107,2 частоташте кажне кечын йӧратен колыштам. Тушто самырык жапемым ушештарыше муро-влак йоҥгалтыт, тыгайже поро шарнымашым пӧртылта.
Сылне сем поснак эрдене кумылым нӧлта. Но шуко гана шекланенам: мӧҥгыштӧ эрдене воштончыш ончылно кушталтем гын, пашаште кумылем вола. Тидым ынде ушышкемак пыштенам.
Алевтина Байкова ямдылен.
Авторын фотожо.
