Марий Эл правительстве председательын алмаштышыже Дмитрий Троицкий Российысе вӱд ресурс Верхне-Волжский бассейновый вӱд управленийын вуйлатышыже Александр Баринов да Марий Элын пӱртӱс поянлык, экологий да йырым-йырысе средам аралыме министрже Алексей Киселёв дене вашлийын.
Нуно Оршанке районысо Изи Кугунур ял воктене Ошла эҥерыште водохранилищыште паша кузе кайыме нерген мутланеныт. Тудым Россий Президент Владимир Путинын кӱштымыж почеш «Экологий» нацпроектын «Ойыртемалтше вӱд объект-влакым аралымаш» федеральный проектше дене келшышын шуктат.
Тыгак вашлиймаште Бассейновый советлан ямдылалтме нерген мутланеныт. Тудо сентябрьыште Йошкар-Олаште лийшаш.
Умбакыже Александр Баринов ден Алексей Киселёв тений кол-влакын мӧртньым кышкыме жапышт деч вара тӱҥалме мероприятийым эртарыме объектыш миеныт.
Ушештарена, 2024 ий мучаш марте Марий Элыште Ошла эҥерыште водохранилищын кумдыкшым ден пундашыжым эрыктат да кийылтше пушеҥге воштырлам, моло шӱкшакым, тыгак кушкыл-шамычым кораҥдат. Тиде пашам ӱмаштак тӱҥалме да ноябрь марте мучашлышаш улыт. «Ойыртемалтше вӱд объект-влакым аралымаш» федеральный проект дене келшышын мероприятий-влакым эртараш Росводресурс управлений 43,9 млн. теҥгем колтен.
Марий Эл Республикым вуйлатышын пресс-службыжын уверже негызеш Л.Камалетдинова ямдылен
