Йолташ-влак, тендан полшымо дене кодшо арняште мурызо-шамыч шке коклаштышт тыгайрак «тошкалтышым» чоҥеныт.
- Геннадий Васильев, Таисия Смирнова – «Шарнымаш кас»
- Эльмира Усова – «Могай пиал»
- Ксения Смородинова, Мария Егошина – «Ом вучо»
- Татьяна Галкина – «Аваем, ачаем»
- Володя Матвеев – «Ӱдырем»
- Иван Соловьёв – «Ару урем»
- Иван Смирнов – «Марий кас»
- Анита Феоктистова – «Тылат»
- Кирилл Новосёлов – «Пӱнчерем»
- Лада Рыбакова – «Чонем мура»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Кум гармоньжо уло
Кирилл Новосёлов – Шернур муниципал округысо Кукнур кундемысе Кугу Пӱнчер ялыште кушкын. Кызыт Кукнур кыдалаш школышто 9-ше классым тунемын лектын.
Кирилл семӱзгарым шке семынжак шокташ тунемын. Кугу сценыш кок ий ончыч, шымше классыште шинчымашым налмыж годым, лекташ тӱҥалын. Икымше гармоньымат лач тунам пӱгыльмым поген ужалыме шийвундо дене налын. Тудо «Тульская» маналтын. Идалык эртымеке, рвезе эше ик гармоньым шканже налын, а кумшыжым, «Шуйская» манмыжым, ӱмаште шыжым Артур Ефремовым шарныме лӱмеш самодеятельный автор да мурызо-влакын «Самырык чонетым тарвате» район кӱкшытан II фестиваль-конкурсышто сеҥен налын.
– Кызыт шукыж годым «Шуйская» гармонь дене сценыш лектам. Шукерте огыл икымше семӱзгарем ужален, весым, «Вятская» маналтеш, нальым. Сценыш ма калык ончыко шокташ шукыж годым нине кок гармонем дене лектам. Нуно йӱкышт да тональностьышт дене чотрак келшат, – палдара Кирилл. – Репертуарыштем утларакше такмак-влак улыт, нуным ойыртемалтшыракым погаш тыршем. «Пӱнчерем» муро чонемлан лишыл да шерге ялем нерген. Тудым гармоньым шоктен муралтен колтем, да чонемлан ласкан чучеш, кумыл нӧлталтеш, да вий-куат ешаралтеш.
Алевтина БАЙКОВА
Фотом еш альбом гыч налме
