М.В.Ломоносов лӱмеш лицейыште «Кванториум» йоча технопарк почылтын. Республикыштына тудо – кудымшо.
Черетан йоча технопаркым торжественно почмаште Марий Эл образований да науко министр Лариса Ревуцкая лийын. Тудо палемден: школ «Кванториум» – тунемше-влаклан цифран экономикан илышыште ик эн кӱлешан моштымашым вияҥдаш веле огыл, тыгак конкурс ден олимпиаде-влаклан ямдылалташ да тушто сеҥаш сай йӧн.
Технопаркыште биологий, физике, химий да роботехнике дене занятийлам эртараш кызытсе жаплан келшыше оборудованиян лабораторий-влак улыт. Тунемме программе кышкарыште йоча-влаклан «Практический химий», «Йырым-йырна физике», «Хайтек», «Нанотӱняш икымше ошкыл», «Роббо» да моло курс дене шинчымашым пуаш тӱҥалыт.
Г.Кожевникова
Фотом Марий Эл Образований да науко министерствын сайтше гыч налме
