8 августышто Марий Эл вуйлатыше Юрий Зайцев уэмден тӧрлатыме деч вара Одывлак – Кужэҥер – Параньга корнын ужашыжым почын.
Еҥ-влак ты корным шотыш кондымым 2005 ий годсек вученыт. Кок ий ончыч августышто Кужэҥер районын чолга еҥже-влак Юрий Зайцевым тиде корным ачалаш йодыныт. Тыге тылеч вара паша тӱҥалын да тудым палемдыме жап деч кок тылзылан ончычрак ыштен шуктеныт. 4 км кужыт корным уэмден тӧрлаташ 458 миллионат 700 тӱжем теҥгем кучылтмо.
– Таче мемнан чынже денак пайрем. Тиде проектым илышыш пуртымым район кужу жап вучен. Корным «Лӱдыкшыдымӧ сай качестван корно» национальный проект дене келшышын чоҥымо. Ме Президент Владимир Путинын чыла корным нормативыш кондаш кӱштымӧ задачыжым умбакыже шуктена.
Корно озанлык министерствылан, «Марий Эл Дорстройлан» да проектыш ушнышо-влаклан чылаштлан тауштем. Ончыч корно моткоч уда лийын, а кызыт – чапле магистраль, – корным почмо годым каласен Юрий Зайцев.
Кужэҥер район администраций вуйлатыше Сергей Михеев ачалыме пашам шуктымылан республик вуйлатышылан таум ойлен.
Марий Эл Республикым вуйлатышын пресс-службыжын уверже негызеш Л.Камалетдинова ямдылен
