Медведево районысо ЗАГС-ыште марий сӱан эртен.
2026 ийым Российысе калык-влакын икоян улмо идалык семын увертарымым шотыш налын, ЗАГС пашаеҥ-влак тений этнический сынан сӱан возалтмашым эртараш кумылаҥыныт да тидын шотыштак калык деке йодмаш дене лектыныт ыле. Икымше сӱан руш лийын гын, 3 мартыште регистраций марла эртен, Татьяна ден Вадим Блиновмытын ешышт шочын. Нуно тений возалтше 75-ше мужыр лийыныт.
Марий регистрацийыш республикысе ЗАГС пашаеҥ-влакымат ӱжыныт. Т.Евсеев лӱмеш национальный тоштерын шанче пашаеҥже Надежда Васканова марий сӱан йӱла дене палдарен. Медведево район Пӱкшерме фольклор пӧртын «Весела кумыл»калык ансамбльже пайрем кумылым нӧлтен.
Светлана Носова
Снимкылаште: у еш шочмо тат.
Медведево ЗАГС-н воткылже гыч налме фото.
