Тыгай йодышлан пӧлеклалтын ыле Йошкар-Ола администрацийыште эртыше IV межрегиональный шанче-практик конференций.
Такшым, тыгай кугу форум 5 ийлан ик гана эртаралтеш. Тений тудо Йошкар-Олан 440 ияш лӱмгечыжлан пӧлеклалтын. Тушко Москва, Казань, Елабуго, Нижний Новгород, Самара, Саратов, Cаранск, Пенза, Чебоксар, Йошкар-Ола, Волжск, Козьмодемьянск, республикысе районла гыч участник-влак толыныт. Белоруссий гыч ик еҥ заочно докладым лудын.
Конференцийыш толшо-влакым Марий Эл вуйлатыше лӱм дене республикысе правительстве председательын икымше алмаштышыже Евгений Кузьмин саламлен. Марий Эл Кугыжаныш Погын председательын алмаштышыже Наталья Козлова, Йошкар-Оласе депутат-влакын погынымашыштым вуйлатыше Виктор Кузнецов, Йошкр-Олан мэрже Евгений Маслов, марий митрополит Иоанн мутым ойленыт.
«Олан эртыме корныжо кужу да куштылго огыл лийын: изи пу крепость гыч сайын вияҥе да ойыртемалтше рӱдола марте. Таче Йошкар-Ола – марий ден руш тӱвырам, акрет йӱла ден кызытсе жапын ойыртемжым иквереш ушышо ола», – ¬ палемден Юрий Зайцев.
Нылымше гана эртаралтше ты конференций Российын тӱрлӧ регионжо гыч толшо ученый ден эксперт-влаклан Кокла Юлын олаже-влак дене кылдалтше пӱсӧ йодыш-влакым каҥашаш площадкыш савырнен. Юрий Зайцевын палемдымыж почеш, ты шанче-практик конференций кышкарыште кугу мутланымаш ола-влакын историйыштышт у лаштыклам почаш да нуным вияҥдаш практический темлымаш-влакым лукташ полшен кертеш.
Мероприятийыште «История Йошкар-Олы» тӱшкан ямдылыме монгорафийын презентацийже, Марий Эл нерген историко-документальный да художественный ончер-влак эртеныт. Пленар ден секционный заседанийлаште чылаже 95 доклад ден выступлений йоҥгеныт.
Марий Эл вуйлатышын пресс-службыжын уверже негызеш С.Носова ямдылен.
