Кодшо кугарнян Марий Элыште Калык переписьым ямдылен да эртарен колтымо шотышто республиканский комиссийын черетан заседанийже эртен. Тудым Маристат вуйлатышын пашажым жаплан шуктышо Инна Петрова вӱден.
Каласен кодыман, ты комиссий перепись жапыште кажне арнян кок гана чумырга. Маристатын пытартыш иктешлымашыж почеш, республикыште переписьым 50 процент калыкна эртен, тиде 368,5 тӱжем еҥ. «Госуслуги» портал гоч гына 31,7 процент возатылтын. 2,1 процентше переписной стационар участкылаш миен. Утларак еҥым авалташ манын, Маристат кугурак предприятийлаш еҥ-влакым верыште возен налше бригаде-влакым чумырен колтедылеш.
Коронавирус чер деч эскералтме амал дене переписчик-влак арнялан ик гана тестированийым эртат. Республикысе правительствын кӱштымыж почеш, переписчик-влак удостоверенийыштым ончыктен, транспортышто яра кудалыштын кертыт.
Переписчик пашам шуктышо семын самырык-влаклан ик тыланымашым луктын ойлымо шуэш. Пеленда илыше кочада, ковада-шамычлан переписьым эрташ полшыза. Нуно совет жапыште илыше граждан семын шке долгыштым шуктынештак. Но ик татыште нунылан интернет дене пайдаланаш тӱҥалаш неле. Сандене жапда, йӧнда лекме семын «Госуслуги» порталыш пурен, нунын олмеш калык переписьын йодышыжо-шамычлан вашешташ ида ӧркане.
С.Носова
