2–4 ноябрьыште Татарстан Республикыште регион-влак кокласе «Рукопожатие республик» музык да поэзий фестиваль лийын. Тудым Татарстан Республикын Тӱвыра министерствыжын полшымыж дене Руш калыкле-тӱвыра ушем, А.С.Пушкин лӱмеш тӱвыра рӱдер, Озаҥысе «Диалог» поэзий театр эртареныт.
Фестивальыш Татарстан, Чуваший, Мордовий, Удмуртий, Башкирий гыч поэт да писатель-влак погыненыт. Марий Эл гыч Константин Шемякин, Андрей Шурыгин, Сергей Земцов, Татьяна Кадышева да самырык поэт Саша Вашко миеныт. 2 ноябрьыште А.С.Пушкин лӱмеш тӱвыра рӱдерыште фестиваль почылтмо годым нуно Г.Камал лӱмеш Татар кугыжаныш академический театрын симфонический оркестржын шоктымыж почеш шке возымо почеламутыштым лудыныт.
– Кокымшо кечын ме Чистополь олам ончен коштынна, Борис Пастернакын памятникше деке пеледышым пыштенна, тудын лӱмжым нумалше Мемориал музей-пӧрт дене палыме лийынна. Мут толмашеш, Кугу Отечетвенный сар годым Чистополь ола ятыр совет писательлан, нунын коклаште – Б.Пастернак, Н.Асеев, А.Тарковский, А.Твардовский, М.Исаковский, М.Цветаева, А Сурков да молат лийыныт – шочмо суртыштым алмаштен, – каласкала Андрей Шурыгин. – «Юл кундемысе калык-влакын литератур палитрышт» теме дене йыргешке ӱстел йыр чумыргымо годым мый Руш литератур клубын Марий Элысе пӧлкажын пашаж дене палдаренам.
Каласыман, Андрей Шурыгин ты фестивальыш тӱҥалтыш гычак, 2016 ий годсек, ушна. Икымше гана фестиваль Озаҥыште Калык-влакын келшымаш пӧртыштышт эртаралтын, тунамак лӱмжым шоненыт, Андрейын «Рукопожатие республик» манаш темлымыже чылалан келшен да кызыт ты лӱм дене чаплана.
Пытартыш кечын, 4 ноябрьыште, участник-влак Озаҥысе Лядский садыште верланыше Г.Р.Державинлан шогалтыме чапкӱ воктек пеледышым пыштеныт, Е.Баратынскийын литератур тоштерышкыже экскурсий дене миен коштыныт. «Ятыр оҥай экспонат коклаште картла модаш келыштарыме изирак письменный ӱстел пеш шергаканлан шотлалтеш, вет ты ӱстел коклаште 1833 ий сентябрьыште Казаньыште лиймыж годым руш поэзийын генийже Александр Сергеевич Пушкин шинчен», – ойла поэт А.Шурыгин.
Л.СЕМЕНОВА
Фотом А.Шурыгинын альбомжо гыч налме
