7 ноябрьыште Йошкар-Олаште Самырык-влакын полатыштышт «Келшен илымаш» фестиваль эртен. Тушко Марий Элыште илыше да тӱрлӧ калык гыч лекше тӱжем утла ӱдыр-рвезе ушнен.
Мероприятий Марий Эл Республикын да Калык-влакын икоян улмо кечыштлан пӧлеклалтын. Ты фестиваль ынде латикымше гана эртаралтеш. Тушко мийыше-шамыч Российыште, Узбекистаныште, Азербайджаныште, Индийыште, Колумбийыште илыше, араб ден Африке элласе калык-влакын тӱвырашт дене палыме лийыныт.
Самырык-влакын фестивальыштым почмаште Марий Эл вуйлатыше Юрий Зайцев лийын. Тудо «Этногородок» выставкым ончен лектын. Тушто самырык-влакын ушемлашт шке калыкыштын тӱвырашт, йӱлашт дене палдареныт.
«Фестивальын лӱмжак шуко нерген ойла. Мемнан кугу Российна шке элжым нимучашдымын йӧратыше ятыр калыкым уша. Марий Элна кугу огыл гынат, тушто 50 утла тӱрлӧ калык пырля келшен ила. Республикна унам ончен мошта да тудым лишкырак пален налаш тыршыше-влакым эре кумылын вашлиеш. Чылаштлан келшен илаш, чонышто порылыкым тыланем», – каласен Юрий Зайцев.
«Келшен илымаш» фестиваль Марий Элыште илыше калык-влак кокласе келшымашым пеҥгыдемдаш, калык тӱвыра-влакым арален кодаш да вияҥдаш, тӱрлӧ калык гыч лекше ӱдыр-рвезе-шамыч коклаште кылым ышташ эртаралтеш.
Марий Эл вуйлатышын пресс-службыжын уверже негызеш Лидия ШАБДАРОВА ямдылен
Д. Речкинын фотожо/ Марий Эл вуйлатышын пресс-службыжо
