29 август – Кинде илян.
Марий йӱлан чинче тушыжо:
Оръеҥым качын суртыш кондымо годым сӱан калыкын мурыжо:
«Волгенче коеш ида ман –
Мемнан шовыч тыге коеш.
Шем пыл кӱза манын ида ман –
Мемнан сывын тыге коеш.
Кӱдырчӧ кӱдырта манын ида ман –
Мемнан тӱмырна тыге шокта.
Агытан мура манын ида ман –
Мемнан шӱвыр тыге шокта.
Шонанпыл шога манын ида ман –
Мемнан пӱгӧ тыге шога.
Чаҥ йӱк шокта манын ида ман –
Мемнан оҥгыр тыге шокта.
Кече нӧлтеш манын ида ман –
Мемнан каче тыге коеш.
Тылзе нӧлтеш манын ида ман –
Мемнан ӱдыр тыге коеш».
В.Т.Михайловын «Калык ойпого – калык чон поянлык» книгаж гыч налме, 2017 ий.
Черке йӱла почеш:
26 август – Задонскысо святитель Тихонын кечыже. Юмынаван «Шым умдан» («Семистрельная») юмоҥажын кечыже.
27 август – Преподобный Феодосий Печерскийын кечыже.
28 август – Юмын Аван мален колтымо гай колымыжо, Успений пайрем.
29 август – Эдес ола гыч Константинопольыш Господь Иисус Христосын Нерукотворный образшым кондымо кече. Кумшо Кинде (Пӱкш) Спас. Юмын Аван Феодоровский юмоҥажын кечыже.
31 август – Юмын Аван «Всецарица» юмоҥажын кечыже.
Юмын Аван «Всецарица» юмоҥажлан пелештыме молитва:
«О, Юмын Шочыктышо пеш поро да чудым ыштыше Ава, Пантанасса, Всецарице! Тыйым шке леведыш йымакем пурташат йӧрдымӧ улам. Чаманыше Юмын чаманен моштышо да йӧратыше чонан Аваже семын шомакым каласе, да мыйын чонем тӧрлана, да мыйын вийдыме капем пеҥгыдемеш. Сеҥаш лийдыме куатет уло, да Тыйын тӱрлӧ мутет шукталтде ок код. О, Всецарице, Тый мыйын верчем йод. Тый мыйын верчем сӧрвале, да Тыйын чапле лӱметым эреак, кызытат да мучашдыме курымла гоч чапландарена. Аминь»
«Марла молитва-влак» книга гыч налме,2005 ий
Шарнаш кодшо ой:
Пӱркытат вигак шулдыран ок шоч.
Пӱсӧ кӱзым огыт шумо.
Сай муро ок тошем.
Самырык годым вий куатле, а уш – шала.
Сар айдемым вашке вуеш шушым ышта.
Сар ошым шемемда, шемым ошемда.
Сар пиал кок тӱран керде гай: теве тышке пӱчкеш, теве тушко кереш.
Сарым шинча гына огыл, тупкоремат ынже уж.
А.Е.Китиковын «Марий калыкмут мутер» книгаж гыч налме,1990 ий.
Ӱмырым илен эртарышын каҥашыже:
«Пуста чондаян еҥ нужна огыл, пуста чонан еҥ – нужна.
С.Носова ямдылен
Снимкыште: тӱрлӧ кушкыл ден пеледыш гыч ыштыме марий шӱлышан курчак.
Авторын фотожо
