10 декабрь – Марий тиште кече.
Марий кумалтышын чинче тушыжо:
«Тылзеава, тичмаш йыргешке чуриет дене мемнам ончен савырнетат, илыш вашталтышым эскерет, шкеат илышым вашталташ, илышым тӧрлаш тыршет, кугуракым жаплаш туныктет, пашам йӧраташ туныктет, ондалыде илаш полшет, кушкылын вожшым, вольыкын, айдемын лулегыжым пеҥгыдемдет, куатым, чон пеҥгыдылыкым пуэт. Тылат тау мутым каласен кумалына, кумалме мут-влакым Юмо деке виктараш йодына. Ончыкыжымат тылзе гыч тылзыш модын-воштыл илаш полшо, мӱндыр гыч толшо осал шӱлыш деч арале».
«Марий сугынь» книга гыч налме, 2005 ий.
Черке йӱла почеш:
10 декабрь – Юмын Аван «Знамение» юмоҥажын кечыже.
11 декабрь – Священномученик митрополит Серафим Чичаговын кечыже.
13 декабрь – Святой апостол Андрей Первозванныйын кечыже.
Йоча-влак верч молитва гыч:
«Пылпомышысо Ача! Шке койышем дене йоча-влаклан кӱлдымашым ончыкташ огыл манын, чыла шотыштат шкем сайын кучаш мыланем вийым пу; йоча-влакын койышыштым эреак эскерен, тӱрлӧ кӱлдымаш шонымаш да кугешнымаш кумыл деч кораҥде, языкыштым касаре, тореш шогымо койшыштым, айда-йӧра шонымыштым чаре, тек нуно шӱм йодмышт почеш огыт ыште, тек Тыйымат, тыйын законетымат огыт мондо. Закондымо пашат ушыштым да тазалыкыштым тек ок лунчырто, языкышт чон да капкыл куатыштым ок иземде…»
«Марла молитва-влак» книга гыч налме, 2005 ий.
Шарнаш кодшо ой:
Пундышым сайын чиктет гын, тудат мотор коеш.
Пӧръеҥ – вуй, ватыже – шӱй.
Поро еҥын шонымашыже каваште, осал еҥын – копа пундаште.
Поктен колташ вашке лиеш, ӱжын кондаш – неле.
Пирым шорык кӱтӱш огыт тарле.
Писе эҥерын пундашыже кӱан лиеш.
Пий ӧрда гын, озажымат монда.
Пиалым кажныже шке семынже виса.
От кылде гын, выньык воштыр вашке йоген пыта.
А.Е.Китиковын «Калыкмут» книгаж гыч налме, 1991 ий.
Ӱмырым илен эртарышын каҥашыже:
«Шеҥгеке ида ончо – тушто нимо ок вашталт».
«Угыч тӱҥалаш вараш кодын огытыл:
Опытет уке гынат,
Шкаланет от ӱшане гынат,
Ресурсет уке гынат,
Чылан тыйым чарат гынат,
Эҥертышет уке гынат».
Светлана Носова ямдылен
Снимкыште: Шернур кугорно деч Шуарсола велыш наҥгайыше корно воктене (ончыч тушто Тошто Акашево села лийын) кызыт тошто черке у сыным налеш. Тудо Иисус Христосым тынеш пуртышо Иоанн Предтечьын вуйжым руал кудалтыме кечылан пӧлеклалтын.
Авторын фотожо
