Пайрем дене!
Кажне эрым – ӱшан кумыл дене
Мемнан школысо профсоюз организаций 35 пашаеҥым ушен шога. Нунын кокла гыч ӱдырамашыже – 29, тушечын туныктышыжо – 14. Туныктышына-влак йочан шинчымашыжым пойдарымаште тыршен ыштат.
Руш йылме ден литературым туныктышо Алефтина Ефимовна Горохова наставничество пашаште шумо сеҥымашыжлан Профсоюз регионал организаций президиумын Почётан грамотыж дене палемдалтын. Марий йылме ден литературым туныктышо Галина Ивановна Антонован тунемшыже-влак кажне ийын ты предметла дене республик кӱкшытан олимпиадыште шинчымашыштым тергат, сеҥышышкат лектыт.
Кугу Пумарий школ гыч педагог-влак Кутузовмыт ден Веселовмытын еш династийышт «Марий Элысе паша династий» республик конкурсышто икымше верым налын. Ты династий гыч Любовь Ивановна Кутузова 40 ий школышто математике ден физикым туныкта. Вероника Ивановна Веселован школ директор пашаште стажше кугу огыл гынат, кыртмен ышта – йоча-влакым спортлан шӱмаҥда, моло шымлымаш пашам вияҥда.
Мемнан чолга ӱдырамашна-влак мурен куштымо мастарлыкышт денат ойыртемалтыт, «Мунло» конкурсыштат кажне ийын уш-акылыштым тергат.
Чылаштым ме идалыкын эн сылне шошо пайремже дене саламлена. Кажне эрым ӱшан кумыл дене вашлияш, у кӱкшытыш шуаш, йӧратыме да йӧратыше лияш тыланена!
Параньга район Кугу Пумарий школын профсоюз комитетше.
Снимкыште: Кугу Пумарий школын усталык ешыже.
Школ деч налме фото.
Мужыр лаштыкым Юрий ИСАКОВ ямдылен.
