25-27 майыште «Шочмо палетым терге!» акций жапыште дерматоскопийым 713 еҥ эртен.
Меланомым диагностироватлыме тÿнямбал кече вашеш Республиканский коваште-венерологический диспансерын специалистше-шамыч регионышто илыше калыкым шочмо палым тергыкташ ÿжыныт.
Тыгеракын, Йошкар-Оласе Патриарший площадьыште кум кечыште 713 еҥ коваштыжым дерматоскопий йöн дене тергыктен. Ты чот гыч специалист-влак 40 пациентын онкологий чер дене черланен кертмыжым рашемденыт да онколог-шамыч дене келгынрак шымлалташ колтеныт.
Урем акций республикыштына ынде кумшо гана эртаралтын. 2020 ийыште у коронавирус инфекцийын шарлымыжлан кöра кожвендиспансерын специалистше-влак коваштым шымлыме форматым вашталтеныт – нуно кумылан чыла еҥым ончычсо семын медицине тöнежыш огыл, а утларак лÿдыкшылымö верыш – рÿдоланан Патриарший площадьышкыже – ÿжыныт.
Тений акцийым эртарыме жап йÿштö да йÿран лийын гынат, шочмо палым тергыкташ Йошкар-Олаште илыше-влак веле огыл, республикнан районлаж гычат толыныт. Тидлан амалжат уло: калык коваште ракын осаллыкше нерген сайын пала, сандене йöн улмо годым дерматоскопийым эрташак тырша.
М.ИВАНОВА
