Геннадий САБАНЦЕВ
8–10 августышто, Йошкар-Олан кечыжым кумдан палемдыме жапыште, марий рӱдолаште икымше гана регион-влак кокласе книга фестиваль эртаралтеш. Тудо «Чарлаште – книга пайрем» маналтеш да Марий книга савыктышын шушаш (октябрь тылзе тӱҥалтыште) 100 ияш лӱмгечыжлан пӧлеклалтеш.
Нине кечылаште Чарла кремль кӧргыштӧ книга ончерым шарат да ужалаш тӱҥалыт, писатель да литературовед-влак дене вашлиймаш, книгам савыктыме паша нерген мутланымаш эртат. Культур программе поян: экскурсий, концерт, сылнымут спектакль палемдалтыт.
Фестивальыш участник да уна семын тӱрлӧ кундемла гыч национальный савыктыш-влакын еҥыштым ӱжмӧ. Тышке Татарстан, Башкортостан, Чуваший, Коми, Удмуртий, Хакасий республикла гыч, тыгак Киров ден Рязань областьла, Моско ола гыч книга пашаеҥ-влак толшаш улыт. Фестивальым Марий Эл Республикын Тӱвыра, савыктыш да калык-влакын пашашт шотышто министерстве, Йошкар-Ола администраций, «Марий книга издательстве» савыктыш пӧрт, «Чарла кремль» культурно-исторический комплекс вораҥдарат.
Тиде книга фестиваль писатель да савыктыш пашаеҥ-влакын веле огыл, тыгак литературым йӧратыше да жаплыше еҥ-влакын вашлийме верышкышт савырнышаш. Туныктышо ден библиотекарь-влакат ӧрдыжеш огыт код, шонена. Фестиваль годым эртаралтше ярмиҥга гыч чапле книга-влакым налын каяш да мӧҥгысӧ шӧрлыкым пойдараш моткоч сай йӧн лектеш.
Тыгеракын, Йошкар-Олаште 8–10 августышто эртаралтше регион-влак кокласе икымше книга фестивальыш пагален вучат!
