Февральыште Йошкар-Оласе Рӱдӧ паркыште йӱдвел коштмаш шотышто мастер-класс-влакым яра эртарат.
Спортын тиде видшым йӧратыше-шамычым кажне рушарнян 12 шагатлан «Тукым пушеҥге» скульптур композиций воктене Марий Элысе Йӱдвел коштмаш федерацийын инструкторжо-влак вучаш тӱҥалыт.
Таче, 4 февральыште, мастер-класс «Идалыкын йӱштӧ пагытыштыже тренировкылан экипировкым ойырен налмаш» теме дене лийын. Шушаш рушарнян йӱдвел коштмашлан лачшымак могай тоям ойырен налаш кӱлмӧ нерген каласкалат. 18 февральыште тренировкылан келшен толшо трассым ойырен налаш туныктат. 25 февральыште йӱдвел коштмашын кӧлан пайдале улмыжо, а кӧлан зияным ыштен кертмыж дене палдарат.
Тренировкылан скандинав тоям мероприятийын организаторжо-влак пуат.
Мастер-классым 15 градус деч йӱштӧ игечыште огыт эртаре.
Йӱдвел коштмаш шотышто занятий-влакым вӱргече еда 11 шагатлан Звенигово олаштат «Пойдём ходить, республика» проектын кышкарыштыже эртарат, палдара районысо калыкым социально обслуживатлыме комплексный рӱдер.
Рӱдер пеленысе «Двигай время» группылан (снимкыште) тренировкым йӱдвел коштмаш шотышто инструктор Н.Кузнецова Юл эҥер серыште эртара. Занятийыш кумылан чыла еҥ ушнен кертеш.
М.ИВАНОВА
Звенигово районысо калыкым социально обслуживатлыме комплексный рӱдерын фотожо
