2027 ийыште Марий Элыште йоча-влакын каныме тазалыкыштым пеҥгыдемдыме кум рӱдерыште капитально олмыктымо пашам ышташ палемдыме.
Тидын нерген регионын правительствыжын заседанийыштыже увертареныт. Марий Элым вуйлатыше Юрий Зайцевын вуйлатымыж почеш эртыше паша погынымаште 2026 ийысе кеҥежымсе кампаний да 2027-2028 ийлан йоча лагерь-влакым вияҥдыме шотышто каҥашеныт.
Регионым вуйлатыше задачым шынден: йоча-влакын тазалыкыштым пеҥгыдемдыме дене кылдалтше инфраструктурым вияҥдыме пашам умбакыже шуяш. 2027-2028 ийлаште кок медпунктым, тынарак пищеблокым да каныме кумдыкым капитально олмыкташ палемдыме. Тыгай паша «Роза ветров» рӱдерын «Сосновая роща» тунемме да тренировкым эртарыме базыштыже, «Лесная сказка» эмлыме-тазалыкым пенгыдемдыме комплексыште , тыгак Володя Дубинин лӱмеш тазалыкым пеҥгыдемдыме да тунемме йоча рӱдерыште ышталтшаш. Олмыктымылан окса федеральный бюджет гыч ойыралтеш.
Заседанийыште лагерь-влакын сетьыштым арален кодаш да тудым кумдаҥдаш, 2027 ийысе кеҥежымсе кампанийыште шукырак йочам авалташ, начар тазалыкан икшыве-шамычлан тазалыкым пенгыдемдаш йӧным ышташ кӱштымӧ. Профилян да инклюзив сменылам льготан категорийыш пурышо-влаклан 2027 ий 30 сентябрь марте эртараш палемдыме.
2026 ийыште йоча-влаклан тазалыкым пенгыдемдаш да канаш йоным ыштымылан федеральный бюджет гыч 115 миллион утла теҥгем ойырымо, республикысе гыч – 182 миллион утла теҥгем да муниципальный бюджетла гыч – 17 миллион утла теҥгем.
Марий Эл образований да науко министрын алмаштышыже Андрей сущенцовын увертарымыж почеш, 2026 ийыште регионышто икшыве-влаклан каныме да тазалыкым пеҥгыдемдыме 209 организаций пашам ыштен, тидыже ӱмашсе деч нылытлан шуко.
Чылаже лагерь ден санаорнийлаште 28 тӱжем утла йоча лийын, тидыже 2025 ийысе деч тӱжем утлалан шукырак.
Марий Элым вуйлатышын пресс-службыжын уверже негызеш Галина Кожевникова ямдылен.
Фотом Марий Элым вуйлатышын пресс-службыж гыч нал
