Марий Эл радион хит-парадыштыже (кок арня ончыч) Диана Ямбаршева «Йӧратет гын, ит чамане» мурыж дене нылымше верыш лектын.
Диана – Советский районысо Вечын села гыч. Верысе кыдалаш школ деч вара И.С.Палантай лӱмеш тӱвыра да сымыктыш колледжыште тунемын. 2011 ийыште тудым пытарымеке, посёлкысо тӱвыра пӧртыштӧ йоча-влак дене пашам ыштыше пӧлкам вуйлатен. Кызыт тудо Советский районысо рӱдӧ библиотекын краеведений литератур да отечественный историй секторжым вуйлатыше.
Мураш изинекак шӱмаҥын. Репертуарыштыже чылаже кандаш мурыжо уло, иктыжым Ксения Юркина дене дуэт дене йоҥгалтарат.
– «Йӧратет гын, ит чамане» мурем Марий Эл радиошто шукерте огыл йоҥгаш тӱҥалын. Мурылан мутшо ден семжым Александр Мамаев возен, тудак аранжировкым ыштен. Тиде муро йӧратымаш нерген, – палдарыш Диана.
Йӧратет гын ит чамане
Шӱлыкан мардеж пуале,
Кас кава гыч йӱр тӱҥале,
Шавалталын ошкыл кайыме корнынам.
Окнашкем адак ончальым,
Тыйын нергенет шональым,
Садерлаште коктын вашлиялмынам.
Припев:
Вученат гын, ит йомдаре,
Йӧратет гын, ит чамане,
Тый декет мый чоҥешталын пӧртылам.
Шулдыраҥын кайык семын,
Муралталын ныжыл семым
Шӱм-чонем ден тыйым шокшын ӧндалам.
Кечыжат вашке эртале,
Тыйым йӧршын ом сӧрвале,
Ӱжараште кече семын койынат.
Шошо ден кеҥеж жаплаште
Ужаргалше сад коклаште
Тыйым ужаталын мые кодынам.
Алевтина БАЙКОВА
Фотом еш альбом гыч налме
