Ты кечылаште Йошкар-Олаште верланыше Сеҥымашын ХХХ идалыкше лӱмеш тӱвыра полатыште Россий Федераций да Марий Эл тӱвыран сулло пашаеҥже Тамара Дмитриева лӱмеш «Тывырдык» фестиваль-конкурс лийын.
Кокымшо гана эртаралтше мероприятийыште Чуваш, Пошкырт, Марий Эл республикла гыч коло утла коллектив мастарлыкым ончыктен. Чыланат уста улыт, но Гран-прим Уфа ола гыч «Айтуган» калык куштышо ансамбль сеҥен налын.
Гала-концертым Республикысе калык усталык рӱдерым вуйлатыше Александр Луничкин тыге ойлен почын: «Кок ий гыч адакат артистна-влакым вашлийына. Таум каласена да вуйым савена Тамара Викторовна Дмитриевалан. Тале курыкмарий ӱдырамаш Пошкырт вел рвезе-влакым чумырен, кушташ туныктен. Тудын чонжо, вийже чылалан ситен».
Йошкар-Ола гыч «Онар» (вуйлатыше-влак Наталья ден Андрей Дмитриевмыт), Чуваш республик гыч «Суварята» (Анатолий Музыкантов вуйлата), Пошкырт кундем Стерлитамак ола «Кече» (педагог-репетитор Рустем Хайруллин), Тамара Дмитриева лӱмеш «Эрвел марий» да «Онар» йоча ансамбль (Борис Дмитриев вуйлата)… Чынжымак, кажне коллективат шке семынже уста, таче нуным Тамара Викторовна ужеш гын, моткоч куана ыле… Спонсор Евгений Милютинымат палемдаш да тудлан таушташ кӱлеш.
«Марий Эл» кугыжаныш ансамбльын художественный вуйлатышыже, Россий Федераций да Марий Элын калык артистше Славик Асмаев палемден каласыш: «Те тӱрлӧ калыкын куштымашыже-влакым ончыктенда, кумылым нӧлтенда! Тиде тыланда – пеш кугу пайрем. Мыланем ончышо семын куштышо-влакын кумылышт моткоч келшен. Чыланат марла куштеныт, кажне коллектив шке кӱкшытыштыжӧ, но эн-энже – Пошкырт кундем гыч Уфасе кугыжаныш авиационный технике университетын «Айтуган» калык куштышо ансамбльже (вуйлатыше Альфия Сайфуллина).
Мыят артист-влакын куанен онченам. Пошкырт кундем Краснокам район гыч «Тыныптӱр сем» ансамбльыш коштшо-влак илалше улыт гынат, кузе чаплын кертыт! А йоча-влакше кузе куштат! Нуныжым ончен, «тугеже марий куштымашын ончыкылыкшо уло» ман куанен шоналтет. Кажне коллектив марий йӱлажым арален ила, сандене кажныжлан вуйым савыме шуэш.
М.СКОБЕЛЕВ
Авторын фотожо
