Блокадный Ленинградыште илыше ден тудым аралыше-влак «Илыш корным» почмылан 80 ий темме вашеш ик гана тӱлыман выплатым налыт.
«За оборону Ленинграда» медаль але «Жителю блокадного Ленинграда» знак дене палемдалтше граждан-влак, Россий президентын указше дене келшышын, ноябрьыште 50 тӱжем теҥге кугытан выплатым налыт. Тиде оксам пенсий але моло социальный пособий дене пырля автоматически палемдат.
Ик гана тӱлыман тиде выплатым «Илыш корным» – Кугу Ачамланде сар ийлаште блокадный Ленинградлан мо кӱлмым ситараш йӧным ыштыше транспорт магистральым – почмылан 80 ий темме лӱмеш палемдыме.
Выплатым чыла гаяк ветеранлан Российын Пенсий фондшо тӱла. Силовой ведомствын пенсионерже ден ончычсо судья-шамыч тудым шке пенсий органлашт гоч налыт. Пенсионерлан иканаште кок пенсий палемдалтеш гын, выплатым Пенсий фонд гоч ойырат.
Ветеран выплатым ноябрьыште налын огеш керт гын, тудым вес тылзын пуат. Тидыже пенсийым мӧҥгыштӧ але почто отделенийыште налше-шамыч дене кылдалтын.
Палемдыме выплатым республикыштына 13 ветеран налеш.
М.ИВАНОВА
