1 мартыште Россий писатель ушемын Марий Элысе пӧлкажын отчётан погынымашыже эртен.
Тудо саламлымаш гыч тӱҥалын. «Ший памаш» поро кумылым ончыктышо сылнымут фондын (прозаик Василий Краснов вуйлата) Марий Элын калык писательже В.Абукаевын шочмыжлан 65 темме лӱмеш лукмо у медальжым поэт Любовь Абукаевалан, Зинаида Ермаковалан, Анатолий Мокеевлан, прозаик Анатолий Ишалинлан, литературовед Виталий Михайловлан кучыктеныт.
Ушемын вуйлатышыже Светлана Архипова эртыше идалыкым иктешлен. Молгунамсе семынак «Ончыко» (Игорь Попов), «У сем» (Людмила Ягодарова), «Литера» (Сергей Щеглов) журнал-влакын тӱҥ редакторышт, «Кече/Солнышко» журналын пашаеҥже Кристина Архипова ыштыме пашашт нерген каласкаленыт. Пален нална, Марий книга савыктыш кодшо ийын 30 книгам республикын казнаже, а 15 книгам авторын оксаже кӱшеш луктын. Марий Эл тӱвыра, печать да калык-влакын пашашт шотышто министерствын печать да массовый коммуникаций пӧлкажын специалистше, поэт Вячеслав Комаров, Йылмым, сылнымутым, историйым шымлыше В.М.Васильев лӱмеш Марий институтын директоржо Людмила Григорьева писатель-влакым икоян лияш, у произведений дене куандараш ӱжын ойленыт.
Ты гана утыжым пӱсӧ йодыш тарванен огыл. Но… Погынымашын темыже СВО дене кылдалтше лийын гынат, тидын нерген Сергей Щеглов деч молын выступленийыштышт ала-молан ик мутат йоҥгалтын огыл.
Юбиляр-серызе-влак: Геннадий Сабанцев, Эрнест Петров, Алевтина Сагирова, Зоя Висвис, Надежда Федосеева, Валентин Афанасьев, Анатолий Подольский — Россий писатель ушемын Почётан грамотшо дене палемдалтыныт. Каласыман, вуйлатыше Светлана Архипован тыршымыжлан да кылым ыштен моштымыжлан кӧра мемнан ушемна Россий кӱкшытыштӧ пагалымашым налын шога.
2024 ий шошын икымше кечынже икмыняр авторын усталык корныштыжо у омса почылтын. Владимир Матвеев, Татьяна Соловьева, Мария Василевская, Анатолий Беликов, Дина Рычкова, Тамара Петрова, Елизавета Марченкова, Борис Александров Россий писатель ушемын йошкар коман удостоверенийжым налыныт.
Погынымаште палемдышт, вуйверын тачысе кечылан эн тӱҥ сомылжо — Писатель ушемлан 90 ий темме пайремлан ямдылалтмаш. Пашада ушныжо!
СПРАВКЕ семын: Марий Эл писатель ушемыште 74 еҥ шотлалтеш. Пытартыш жапыште ты радамыш 10 возышым пуртымо, тышеч нылытынже рушла возышо, а молыжо марий серызе улыт.
Л.СЕМЕНОВА
Авторын фотожо
