Волжск олалан – 85 ий
Ик эн самырык, но кугу
Волжск Марий Элнан илышыштыже могай верым налын шогымыжо да мыняр еҥ илыме шот дене республикнан рӱдолаж деч вара кокымшо, а ийгот шот дене ик эн самырык олалан шотлалтеш. Ола ышталтмылан тений 85 ий темеш, а тудын негызлылтмыжлан 160 ият эртен.
Эше XIX курым мучаште Лопатино затон серыште купеч Губинын чодырам йыгыше заводшо почылтын. Совет ийлаште тудо «Заря» чодыра заводыш (1923 ий), а вара тыгаяк лӱман чодыра обрабатыватлыше комбинатыш савырнен. Икмыняр жап гыч икымше вичияшын ударле стройкыжо радамыште чоҥымо материал комбинат (1929-1931 ийла) почылтын. Тудын пелен кушшо илем 1933 ий гыч Лопатино пашазе посёлко маналташ тӱҥалын. Вара кокымшо ударле стройко семын Марий целлюлоз-кагаз комбинатым (1934-1938 ийла) пашаш колтымо.
1939 ий августышто Волжский районым ыштыме деч вара пашазе посёлко эшеат писын кушкаш тӱҥалын. Ту жаплан республикысе кандаш кугу промышленный предприятий ден чоҥышо организаций гыч нылытше тушто верланен улмаш. Республикыште ыштен лукмо чумыр промышленный продукций гыч 60 наре процентше тушто ямдылалтын. Посёлкышто илыше еҥ 20 тӱжем нарыш лишемын. Писын кушкын толмыжлан кӧрак Лопатино посёлкым 1940 ий июль гыч олаш савырыме да Волжск лӱмым пуымо.
Сар деч варасе ийлаште ола умбакыже кушкын, у микрорайон-влак шочыныт. Машиностроений ден металлым обрабатыватлыше кугу предприятий-влак чоҥалтыныт. Нунын радамыште «Волжскпродмаш», «Ариада», «Гран», «Волжский электромеханический завод» тачат пашам удан огыл ыштат. Изи да кокла кугытан бизнес мебельым ыштымаште, сатум ужалымаште да услугым пуымаште утыр вияҥеш.
Юрий ИСАКОВ
Снимкыште: ола администрацийын зданийже; олан гербше.
Юрий Исаковын фотожо.
