Морко район Унчо селан эргыже, 1996-1999 ийласе республикын МВД министрже генерал-майор Василий Григорьевым шарныме лӱмеш курыкышто куржталмаш шочмо кундемыштыже 20 сентябрьыште эртен.
Тений тудо кумшо гана профессионал спортсмен ден куржталаш йӧратыше-влакым Янык памаш воктенысе сылне кумдыкыш чумырен. Таҥасымашке Морко, Волжский, У Торъял, Кужэҥер, Шернур, Медведево районла да Йошкар-Ола гыч 200 утла участник ушнен.
– Спорт пайремым почмо дене Россий МВД-н Морко районысо пӧлкажым вуйлатыше Александр Чернов, пӧлка пеленысе общественный советын еҥже-влак Анатолий Титов ден Петр Митрофанов да «Передовик» ялозанлык артель вуйлатыше, Марий Эл Кугыжаныш Погын депутат Юрий Игнатьев саламленыт. Нуно чылалан тазалыкым, палемдыме кужытым сайын эрташ тыланеныт, – палдарыш Василий Андроповичын шольыжын эргыже, Унчо школ директор Андрей Григорьев. – Участник-влак, ийгот дене келшышын да спорт дене кылым кучымо мастарлыкым шотыш налын, 1-9 километрыш куржыныт.
Школышто тунемше-влак коклаште В.Иванова, Л.Муравьёва, Н.Коротков (Унчо), М.Соловьев (Коркатово), Н.Яковлева (Арын), М.Майков (Тошто Торъял), А.Миронов ден Д.Никифорова (Морко) икымше вер дене палемдалтыныт.
18-39 ияш-влак коклаште О.Прядкина (Йошкар-Ола) ден А.Мошкин (Йошкар-Ола), 40-49 ияш-влак коклаште В.Атабаева (Унчо) ден А.Васинкин (Марий Турек район), 50-59 ияш-влак радамыште З.Рябчикова (Волаксола) ден В.Мартьянов (Волжск ола) икымше верыш лектыныт.
60-69 ияш-влак коклаште С.Пайгашева (Унчо) ден И.Мухаметзянов (Морко) эн тале лиймышт дене шукыштлан примерым ончыктеныт.
Сеҥышыш да призер радамыш лекше-влаклан Василий Андроповичын родо-тукымжо ден йолташыже-влак пӧлекым да медальым кучыктеныт.
Таҥасымашын ик эн изи участникшылан Евгения Григорьева шотлалтын. Ныл ияш ӱдыр таҥасымашке вийжым тергаш веле огыл, а чӱчӱжым шарныме семынат ушнен. Тудлан А.Титов лӱмынак ямдылыме призшым кучыктен.
– Чӱчӱм, Василий Андропович, ӱмыр мучкыжо спорт дене кылым кучен. Эше министр лиймыж годым «Молодежный курьер» газетын изирак марафоныштыжо 21 километр утла кужытым куржын эртен. Тудым шарнен да таза илыш-йӱлам кучаш, самырык тукымым шочмо кундемнам йӧраташ таратыше таҥасымашым кажне ийын эртараш шонымаш уло, – палемден Андрей Сергеевич да таҥасымашым эртараш полшышо Юрий Арсентьевичлан, верысе школын туныктышыжо ден кочмывер пашаеҥже-влаклан таум каласен.
А.БАЙКОВА
А.Титовын фотожо
