РФ АФУН-ын Молодёжь советшын председательже Максим Алгайкин Татарстаныште «Мой финно-угорский стиль» фотоончерым почмаште лийын.
Набережные Челны олаште «Родник» Келшымаш пӧртыштӧ эртыше мероприятий «Мы ветви одного дерева» регион-влакласе форумын программыже дене келшышын эртаралтын да Российысе финн-угор калык-влакын тӱвыра поянлыкыштлан пӧлеклалтын.
Фотоончерым почмо годым форумын унаже-влак «Марий книга издательстве» савыктыш пӧртын сылнымутшо дене палыме лийын да шкан келшыше савыктыш-влакым налын кертыныт.
«Калык-влакын тӱвырашт дене палдарыше тыгай мероприятийын кӱлешлыкше кугу. Куанем, мемнан ушемын проектше калыклан чынжымак оҥай. Тиде кызытсе самырык тукымын шке вожшым арален толаш да шочмо калыкыштын йӱлаштын тачысе жаплан келшышын ончыкташ тыршымыж нерген ойла, – воза Максим Алгайкин соцкылысе лаштыкыштыже. – Россий Федераций АФУН-ын Молодёжь советшын лӱмжӧ дене Татарстан Республикын правительствыжлан, Келшымаш пӧртлан да тудын «Родник» коллектившылан, тыгак Марий Элын Тӱвыра, савыктыш да калык-влакын пашашт шотышто министерствыжлан мемнан тӱҥалтышым илышыш пурташ йӧным ыштымыштлан тауштем»
Г.Кожевникова
Фотом соцкылысе лаштык гыч налме.
