2015 ий 4 февральыште «Марий Эл» газетлан 100 ий темын. Тиде йыргешке датылан тунамсе редакций пашаеҥна-влак шуко поро пашам ворандареныт, тӱрлӧ акцийым эртареныт. Шыжым уло редакций дене самырык чодырам шындыме пашашкат ушненыт. «Кугарня» ден «Ямде лий» газет редакций-влакын пашаеҥыштат мемнан дене пырля лийыныт. Тунам 2010 ийысе пожар годым йӱлышӧ Куяр лесничествын ик кумдыкыштыжо изи пӱнчӧ-влакым шындыме. Таче ты чодыраланна ынде 10 ият темеш. Тудын мыняр кушмыжым ончал толаш кумылат уло, но паша коклаште жапым огына му шол. А эртыше пагытым тунам мемнан дене пашам ыштыше фотографна Денис Речкинын фотожо шарныкта.
Светлана Носова
