Пошкырт кундем Мишкан районышто ынде икмыняр ий почела Башкортостаныште илыше финн-угор фольклор коллектив-шамычын регион-влак кокласе «Ший мундыра» этно-фестиваль конкурсышт эртаралтеш. Тений тудо октябрьыште лиеш.
Кодшо арнян тудлан ямдылалтме кышкарыште Уфаште «Культурный кодым вияҥдымашын ик эн тӱҥ факторжо семын Башкортостан Республикыште илыше финн-угор калык-влакын костюм комплексше-влакым ылыжтымаш» йодышлан пӧлеклалтше шанче-практик семинар эртен. Тушко шанчызе, тунемме заведений-влакын студентышт, фольклор коллектив-влакын вуйлатышышт, посна мурызо, кидмастар-шамыч ушненыт. Семинарыште финн-угор калык-влакын чийыме йӱла вургемыштым, ожно могай лиймыжым да нуным кызытсе жаплан келшышын нуным уэмден толмо нерген мутланеныт.
Семинарын пашажым республикысе Калык усталык рӱдерын генеральный директоржо Салават Киреев, регионысо марий-влакын «Эрвел марий» калыкле- тӱвыра автономийыштым вуйлатыше, республикысе Финн-угор калык-влакын ассамблейыштын председательже Радион Плотников почыныт.
Мероприятийын ик спикержылан Т.Евсеев лӱмеш национальный тоштерын декоративно-прикладной сымыктыш пӧлкажым вуйлатыше Дмитрий Байдимировымат ӱжыныт.
Марий секцийыште ӱдырамаш вуйчием ден сӧрастарышым ышташ туныктымо мастер-классым Мишкан район Монар ялысе тӱвыра пӧрт гыч Надежда Михайлова эртарен. Тушечак Ирина Калитова марий тувырым пӱчкеден, ургаш туныктен.
Семинар эртыме площадкыже Уфа оласе технологий да дизайн кугыжаныш колледжыште вераҥын. Тыштак Пошкырт велысе марий-влакын тошто да уэмдыме тувыр-влак дене палдарыше ончер пашам ыштен.
Светлана Носова
Снимкыште: семинар годым.
Фотом «Эрвел марий» автономийын воткыл лаштыкше гыч налме.
