СОЦИАЛ ИЛЫШ

Эсогыл корно куандара

«Демографий» национальный проектын «Кугурак тукым» федеральный проектшым илышыш пуртымо кышкарыште Медведево районысо калыкым социально обслуживатлыме комплексный рӱдерын куснылшо бригадыже 65 ияш деч кугурак ийготан граждан ден инвалид-влакым медицине тӧнежлашке кондыштара.

Палемдыме еҥ-шамыч социальный паша шотышто специалистын ужатен коштыктымыж почеш кумдаҥдыме да келгемдыме диспансеризацийым эртат, чыла анализым сдатлат да аҥысыр специализациян врач дене черет деч посна тергалтыт.  Нунылан тиде услуго моткоч йӧнан, молан манаш гын чыланжак огыл эмлымверыш шонымо да кӱлмӧ семын миен толын кертыт. А специализироватлыме машина мӧҥгышт гычак налеш, социальный паша шотышто специалист документым оформитлаш полша. Корнат моткоч куандара, вет поснак тора кундемлаште лакемше шоҥгыеҥ-шамыч райрӱдыш моткоч шуэн лектын коштыт, да тиде йокрокрак илышыштым мыняр-гынат сӧрастара, кумылыштым нӧлталеш, поро шарнымашым кужу жаплан кода.

Шукерте огыл куснылшо бригаде Медведево районысо Пурсанур ял гыч илалше еҥ ден инвалид-влакым Медведево районысо рӱдӧ больницыш скринингым эрташ намиен коштыктен.

– Диспансеризацийым эрташ, аҥысыр специализациян доктор дене тергалташ эре шонен коштынам, но эмлымвер мӧҥгӧ деч тораште верланен, автобусат чӱчкыдынжак огеш кудалышт. Поликлиникыш пеш лывыргын намиен шуктышт, тошкалтышыште кӱзаш да волаш полшышт, кабинетлашкат шкеак коштыктышт. Черетыште йӧршын ышна шого – врач-влак тиде жапыште лачак мемнам вученыт! Чыла пашам мучашлымек, мӧҥгыш тугакак лывыргын намиен кодышт, – тыгай тӱткышым ойырымылан уло шӱм-чонжо дене таушта Таисия Мамаева.

Медведево районысо Куяр посёлкышто илыше-шамычым диспансеризацийым эрташ Куяр фельдшер-акушер пунктыш намиеныт. Илалше граждан-влак терапевт дене тергалтыныт, анализым сдатленыт да ЭКГ-м эртеныт.

– Эмлымвер марте кошташ куштылгыжак огыл, поснак – телым, сандене мемнан гай илалше еҥ-влакын тазалыкышт верч тыге азапланымылан куаныде огеш лий. Коплексный рӱдерын специалистше Ирина Вячеславовналан мемнаь ужатен коштыктымыжлан, поро кумылжылан, умылымыжлан поснак кугу тау. Тудо пеш сай пашаеҥ, – палемда Клавдия Рузиева.

Мут толмашеш, Марий Элысе куснылшо бригаде-влак идалык тӱҥалтыш гыч 407 еҥлан полшеныт. 65 ий деч кугурак ийготан граждан ден инвалид-шамыч палемдыме социальный услуго дене пайдаланышашлан илыме верысе калыкым социально обслуживатлыме комплексный рӱдерыш йодмашым пуышаш улыт.

М.ИВАНОВА

Снимкыште: социальный паша шотышто специалист Ирина Волкова илалше еҥ ден инвалид-влаклан кумылын полша

Медведево районысо калыкым социально обслуживатлыме комплексный рӱдерын фотожо

 

Опубликовать в Одноклассники

Добавить комментарий