Корным тӧрлымӧ паша умбакыже шуйна, а тыге гын, Йошкар-Оласе мер контрольын еҥже-влак «Йошкар-Ола» ола округ администрацийын, подряд организацийын еҥже-влак дене пырля мом кузе ыштымым тергат. Ты гана нуно Тыныслык уремыште Киров урем гыч Лебедев урем марте кумдыкым ончен савырненыт да акым пуэныт.
Марий Эл вуйлатыше Юрий Зайцевын кӱштымыж почеш, регионышто инфраструктурный да моло проект-влакым илышыш шыҥдарымым мер контроль утларак чот эскераш тӱҥалын.
Тыныслык уремым «Лӱдыкшыдымӧ сай качестван корно» нацпроект дене келышышын шотыш кондат.
– Тиде урем – олан ик эн тӱҥ уремже. Тиде объектыште шуктымо пашан акше 83 миллионат 809 тӱжем теҥге, – палемден Ренат Магсумов, Специальный военный операцийыште улшо-влаклан полшышо «Защитники Отечества» Кугыжаныш фондын Марий Элысе филиалжын вуйлатышыже.
– Тиде уремыште олмыктымо пашам проект дене келшышын 31 август марте мучашлышаш улыт. Мемнан командный пашана пайдам конда да лекше нелылык-влакым кӱчык жапыште решатлаш полша, – ойлен Дмитрий Денисов, Йошкар-Олан социально кӱлешан проектше-влакын координаторжо.
Тыгак тиде мер эскерымаш группо Йошкар-олаште илыше-влак дене эреак вашлийын мутлана да нунын йодмашыштым контрольыш налеш.
Л.Камалетдинова
