У ий да Рошто водын кажне еҥ мом-гынат ӧрыктарышым, кумылаҥдышым, эсогыл лийын кертдымым вуча, да тыгай чудо чынжымак лиеда!
Харьков областьыште илыше шуко шочшан А.-мытын ешыштым Козьмодемьянскысе жаплан вераҥдыме пунктыш 13 декабрьыште конденыт. Ача-аван куд йочашт уло, но Марий Элыш кокытшо дене пырля веле куснен кертыныт, нылытынже пошкудо оласе интернат-пӧртыштӧ кодыныт. Эвакуаций тӱҥалмеке, тушто уже военный действий-влак каеныт, сандене ача-авалан икшывышт деке кудалаш чареныт.
Вате-марий А.-мыт йочашт нерген ныл тылзе нимом пален огытыл. Нунын чоныштым икте почеш вес кочо йодыш чарныде туржын: илыше улыт мо, лӱдыкшыдымӧ верыш куснен шуктеныт мо?..
Марий Элым вуйлатыше Юрий Зайцевын кӱштымыж почеш, йомдарыме йоча-влакым кычалаш тӱҥалыныт, да икшыве-шамычым мумо нерген икымше увер 29 декабрьыште лийын. Тиде пеш кугу чудо!
3 январьыште Марий Эл гыч Луганский областьыш делегаций лектын. Тушто Калык илышым саемдыме шотышто министерствын, Козьмодемьянск ола администрацийын еҥышт дене пырля икшыве-шамычын ачаштат лийын.
5 январьыште А.-мытын ешышт Козьмодемьянскыште угыч пырля да угыч тичмаш лийын.
М.ИВАНОВА
