Республикыштына пытартыш жапыште лийше ик эн куандарыше событий – «Образований» национальный проектын «Кызытсе школ» федерал проектше почеш Марий Турек районысо Сардаялыште у школым чоҥымо паша.
60 веран тунемме верым 2021 ий июнь гыч 2021 декабрь марте чоҥеныт. У оралтым санитарный да моло йодмашлан келшышын ыштыме. Тушко кызытсе жапысе телекоммуникаций инфаструктурым шыҥдарыме: у мебель, интерактивный оҥа, проектор, микроскоп, компьютер-влак, спорт инвентарь да молат.
Школ кумдыкышто спорт площадкат, каныме верат тачысе чын йодмашыжым шуктат, тунемме да опытым ыштыме, тыгак озанлык пашам ворандараш чыла йӧн уло.
Республикын ик эн мӱндыр кундемыштыже у общеобразовательный организацийым чоҥаш федерал бюджет гыч 81 миллион теҥгем кучылтмо.
Г.Кожевникова
