17 январьыште Оршанке районысо кугурак тукымын вашмутланыме рӱдерыштыже Шочмо элым аралышын идалыкшым торжественно почыныт.
Мероприятийын официальный ужашыштыже «Оршанке муниципальный район» муниципальный образованийын вуйлатышыже, депутат-влак погын председательын пашажым шуктышо, «Единый Россий» партийын Оршанке районысо пӧлкажын секретарьже Андрей Шабалин СВО-шко шуматкече да рушарня деч моло кажне кечын маскироватлыше сетьым пидше, окопышто пайдаланыме сортам велыше, йымал вургемым ургышо ветеран-влакын Сеҥымашым лишемдымашке пыштыме надырыштым кӱкшын аклен да кажныжлан Таумутым кучыктен.
Тиде кечын рӱдерышке районысо ветеран-влакым веле огыл, Оршанке посёлкысо кыдалаш школын 5-ше А классыштыже тунемше ӱдыр-рвезе-шамыч ден Россий Вооружённый Вийын Украиныште эртарыме специальный военный операцийыште участвоватлыше сарзе-влакын аваштымат пагален ӱжыныт.
9-ше классыште тунемше Евгений Смирновын, гитарым шоктен, «Сар нигӧлан огеш кӱл» мурым йоҥгалтарымыж деч вара Оршанке район администрацийым вуйлатышын социальный паша шотышто алмаштышыже Валентина Шабалина поснак Шочмо элым аралышын идалыкыштыже патриотизм шӱлышан мероприятий-влакын кӱлешлыкыштым палемден да кушкын толшо тукымлан Кугу Отечественный сарын тулан ийлаже, тылын геройло пашаж нерген кумдан каласкалаш темлен. Тудын кумылжым СВО-што Российын интересшым шке илышым чаманыде аралыше сарзе-влакын авашт авалтеныт. Кажныже эргыжын изиж годым могай лиймыже, школышто кузе тунеммыже, армий гыч мо шотышто вашталтын пӧртылмыжӧ, кызыт телефон дене мом ойлымыж нерген куштыжо йывыртен да кугешнен, а куштыжо логарже пышкемалтын да шинчавӱд йӧре ойлен. Ава-влакын шочшышт верч азапланымыштым кугурак тукым веле огыл, йоча-шамычат пеш сайын шижыныт.
Ветеран Людмила Полушинан сар нерген возымо почеламутшо-влакат шӱм-чоным вургыжтареныт, илыш нерген шонаш, шочмо элым йӧраташ да аралаш таратеныт. Сылнымутчылан самырык тукымым патриотизм шӱлышеш куштымаште надыржылан Оршанке районысо калыкым социально обслуживатлыме комплексный рӱдер директорын алмаштышыже Екатерина Рыбакова Таумутым кучыктен.
Районысо тоштерын специалистше Кристина Кузнецова элым аралыше-влаклан пӧлеклалтше видеофильмым ончыктен, кугу Сеҥымашын кӱлешлыкше дене палдарен.Мероприятийын кышкарыштыже «Ме пырля улына» кружок пашам ыштен.Калыкым социально обслуживатлыме комплексный рӱдерын специалистше Лариса Алексеева сарзе тематике дене кылдалтше икмыняр модышым эртарен. Ветеран ден тунемше-влаклан поснак Российын флагше тӱсан буква-шамыч дене тӱрлӧ слоганым чоҥаш келшен.
Ший ийготан волонтёр-влак тунемше-шамычлан СВО-шко колташ ямдылыме посылкыш пышташ йӧршӧ пӧлекым ямдылыме шотышто мастер-классым эртареныт. Йоча-влак кугу да мотор кампетым ыштеныт, кӧргышкыжӧ тӱрлӧ шере кочкышым оптеныт. Лӱмын келыштарыме посылкыш ӱдыр-рвезе-влакын сӱретышт ден серышыштымат пыштеныт.
Ветеран ден тунемше-влак мероприятийым Российын гимнже дене тӱҥалыныт гын, ӱстелтӧрышкӧ пырля шинчын, чайым йӱын, шарнымаш фотолан войзалтын мучашленыт.
Маргарита ИВАНОВА
Ирина СМИРНОВАН фотожо
