Уло Россий семынак 26 май гыч 1 июнь марте Марий Элыште верланыше общеобразовательный организацийлаште Иктешлыше кугыжаныш экзамен форман иктешлыше кугыжаныш аттестаций эрташ тӱҥалеш. Шинчымашым чылаже 2785 тунемше терга, нунын кокла гыч 175-ше — эртыше ийласе выпускник-влак.
Республикын образований да науко министрже Лариса Ревуцкаян мутшо почеш, тений ЕГЭ-м эртарымаште, ончычсо ийла дене таҥастарымаште, кугу вашталтыш уке. Но «содержательный» манме ужашыште кажне предметыште гаяк тудо уло. Адакшым экзамен материалым интернет сеть дене аудиторийыш колтат да туштак принтер полшымо савыктат. ЕГЭ деч вара паша-влакым тыштак сканироватлышаш улыт, а ондак тидым штабыште ыштыме.
– Предметлаште вашталтыш шотышто ойлаш гын, эн кугужо кумытышто – руш йылме, математике да историй – экзаменысе заданийлаште улыт. Руш йылме дене тергымаште эрыкан форман сочиненийым тунемше мыняр шона, тунар возен кертеш, кугыт шотышто чарак ок лий. Математике дене практике заданий лиеш. Историй дене экзамен материалыште 20 процент деч шагал огыл заданийже – Кугу Отечественный сар дене кылдалтш. Каласыман, мутлан, ончыч тиде предмет дене эн изи балл 38 лийын гын, а ынде 42 лиеш, – каласен министр.
Иктешлыше кугыжаныш экзаменлан чылаже 32 пунктым ямдылыме, кажныштыже шинчымашым тергаш кӱлеш оборудований чыла уло.
Г.Кожевникова
