КУЧЕМ УВЕР

ЧЫЛА ВАШТАЛТЫШ – КАЛЫКЫН ПАЙДАЖЛАН

Таче Йошкар-Олаште Марий Эл Республикын шымше гана чумырымо Кугыжаныш Погынжын 36-шо сессийже лийын.

Заседанийым почмеке, Анатолий Смирнов парламентарий-влакым Кугыжаныш Погынын у депутатше Юрий Игнатьев дене палымым ыштен. Морко районысо «Передовик» ялозанлык артельын председательже эртыше рушарнян 33-шо №-ан ик мандатан Луговой избирательный округышто ешартыш сайлымашыште сеҥен. Анатолий Васильевич тудлан депутатын удостоверенийже ден оҥыш пижыктыме знакым кучыктен.

Депутат-шамыч чылаже 14 йодышым онченыт, Марий Эл Республикын 6 законжо ден Кугыжаныш Погынын 17 пунчалжым пеҥгыдемденыт.

Парламентын пунчалже дене бюджет, бюджет-влак кокласе да налог правоотношений аланыште икмыняр законыш вашталтышым пуртымо.

Тазалык аралтыш, тӱвыра да спорт комитет председательын алмаштышыже Максим Бронниковын кандидатуржым Кугыжаныш Думо пеленысе Молодёжный парламентыште  Марий Эл Кугыжаныш Погынын еҥже семын пеҥгыдемдыме.

«Марий Эл Республикын южо законодательный актышкыже вашталтышым пуртымо нерген» закон верысе бюджет-влаклан йоча-шамычлан канаш да тазалыкым пеҥгыдемдаш йӧным ышташ ойырымо субвенцийым шеледыме радамым вашталтыме, муниципальный общеобразовательный организацийлаште воспитатлыме да йоча мер ушем-влак дене кылым ыштыме шотышто директорын советникшын пашажлан тӱлымӧ радамым пеҥгыдемдыме нерген ойла. Ушештарена: Россий президент В.Путинын кӱштымашыж дене келшышын, тыгай должность кажне школышто пурталтеш.

Волжский да Курыкмарий районлам вуйлатыше-влак южо илем-шамычым иктыш ушаш пунчалмышт дене палдареныт. Мутлан, Волжский районысо Ялагин ден Чолемсола яллаште да Купсола селаште илыше-влак иктыш ушымо Купсола селан калыкше лияш шонымышт нерген ойленыт. Курыкмарий районышто Тодымваж ял Шайыл Пӧртныр ялыш ушна. Амал нине илем-шамычын чак верланымышт, калыкын ик инфраструктур дене пайдаланымыже, верысе мер шкекучемын ик органыштыже улмыжо, кугыжаныш программылашке пырля пураш лиймыж дене кылдалтын. Депутат-влак тыгай шонымашым сайлан шотленыт да келшыше пунчалым луктыныт. Тудын вийыш пурымыж деч вара Марий Элын правительствыже кызытсе нормативный акт-влакым пеҥгыдемдыме вашталтыш дене келыштарышаш.

Регионыштына айдемын праваж шотышто уполномоченный Фанис Мухаметгалиев 2022 ийысе пашажым иктешлыше докладым ыштен. Тиде документым чыла комитетын заседанийыштыже радамын ончымо.

М.ИВАНОВА

Фотом Марий Эл Республикын Кугыжаныш Погынжо деч налме

 

 

 

 

Опубликовать в Одноклассники

Добавить комментарий