УВЕР ЙОГЫН

Чоныш юзо пайрем шӱлышым пуртыш!

Йошкар-Олашке Йӱштӧ Кугызан толмыж нерген газетнан кодшо номерыштыже умбакыже радамлын каласкалаш сӧренна ыле. Тидым уло кумылын шуктена!

Шке поездше гыч лекмеке, погынышо-влак дене саламлалтмеке, «уныкаж» дене пырля кочай перрон мучко эртыш. Вет калык, ойлышна, моткочак шуко чумырген ылеат, шолаште да пурлаште мучаштырак шогышо-шамыч Йӱштӧ Кугызам сайынже ужынат огытыл.

Йӧн дене пайдаланен, ятырынже лач тиде жапыштак тудлан возен ямдылыме серышыштым кучыктышт. Чыным ойлаш гын, паледа, мыят пуышым! Изи годым нигунам колтен омыл, а кызыт Российын тӱҥ Йӱштӧ Кугызаже шкежак мемнан деке толын да йоча годым ыштышашым пел курым эртымеке шукташ тыгай чот кумылем лекте! Шканемже ала-молан изишак йӧндымыракын чучо, но оҥайыс!..

А кӧ кочайлан кидышкыже пуэн кертын огыл але тиде жапыште эше толын шуын огыл улмаш, нуно вараже поезд воктеке вераҥдыме «Йӱштӧ Кугызан почтыжо» яшлыкыш кудалтен кертыныт. Адакшым тудын командыж гыч еҥ-шамычат, йодыштын, поген коштыч. Тиде мылам моткочак келшыш, вет кажныжын возымо серышыже кочай деке миен шужо манын азапланымышт шижалте.

Йӱштӧ Кугызан резиденцийыштыже, ойленна ыле, 19 вагон. Тушто мо гына уке?! Кажныштыже – могай-гынат посна площадке. Да кӧ билетым ончылгоч налын гын, тудо икмыняр вагонышто экскурсий дене эртен кертын. А кӧмыт палыде але налде кодыныт, нуныланат тыгай йӧн садак пуалтын ыле. Тыге, йӱштӧ теле кечын кужу черетыште шогаш логалын гынат, кок вагоныш пурен лекташ кумылан-влак моткоч шукын улыт ыле! Эшежым машинстын кабинышкыже пурен лектын кертыныт! Тылеч посна аниматор ден артист-шамычат погынышо-влакым перронышто тӱрлӧ модыш да куштымаш дене куандарышт.

Шке илыме верже гыч, Великий Устюг гыч, Йӱштӧ Кугыза поездше дене корныш 22 октябрьыштак лектын. Йошкар-Олашке тудо Чебоксар гыч толын да 5 декабрьыште мемнан деч вара Казаньыш каен. Эн пытартыш станцийже Киров ола лиеш. Тушко кочай ден командыже 14 январьыште миен шушаш улыт. Чылаже 130 утла олаште йоча ден кугыеҥ-шамычым куандарышаш!

Икманаш, «Йӱштӧ Кугызан поездше» У ий программе дене элна мучко коштын савырнымыж жапыште кочай шке командыж дене мыняр икшывын, кугыеҥын чонышкыжо юзо пайрем шӱлышым пурта?! А кунам чонышто куан озалана, тунам илышыжат пиаланрак лиеш!

Любовь Камалетдинова                        

М.Скобелевын фотожо

Опубликовать в Одноклассники

Добавить комментарий