Марий Элым вуйлатыше Юрий Зайцев «Чодырам арален кодена» всероссийский акцийыш ушнен.
Медведево район Куяр лесничествыште акций кышкарыште пушеҥгым шындаш толшо-влак дене пырля Юрий Зайцев ты пашам шуктен. Тений тусо ик гектар кумдыкышто 5 тӱжем пӱнчӧ озымым вераҥдаш палемдыме.
Регион вуйлатыше кундемнан ужар поянлыкшым арален да шукемден толмо пашам шуктышо-влаклан тауштен.
«Чодырам арален кодена» акцийыш ушнымылан да чылалан тауштынем. Ме акцийым 2019 ий гыч эртарена. Тиде моткоч кӱлешан да суапле паша. Мемнан кундемна чодыралан поян, сандене мом руымо да мо йӱлен, уэмденак толшаш улына», – каласен Юрий Викторович.
«Чодырам арален кодена» акций «Экологий велым сай илыш» нацпроект кышкарыште тений кандашымше гана эртаралтеш. Тӱҥ шонымашыже – эл мучко 70 миллион пушеҥгым шындаш, калыкым чодыра поянлыкнам арален толаш, чодыра пожарын эҥгекшым кораҥдаш да пӱртӱсысӧ углеводород балансым кугемдымашке надырым пышташ кумылаҥдаш.
Марий Эл кажне ийын самрык чодырам шындыме пашаш ушна. Пытартыш ийлаште гына «Чодырам арален кодена» да «Шарнымаш сад» акций-влак кышкарыште 30 тӱжем наре еҥ 1,5 миллион пушеҥгым шынден. Тений шыжым 1 миллион наре пӱнчым вераҥдаш палемдыме.
Марий Эл вуйлатышын пресс-службыжын уверже негызеш Светлана Носова ямдылен.
