Марий Эл здравоохраненийын первичный звеножым модернизироватлыме регионысо программым илышыш пуртымо кышкарыште Йошкар-Олаште Республиканский клинический больницын офтальмологический консультативно-диагностический отделенийжым капитально олмыкташ 29 миллион утла теҥгем ойыраш палемдыме.
Олмыктымо пашам 2023 ийыште тӱҥалыт. 2022 ийыште проект-смете документацийым ямдылат.
Тиде зданийым 1976 ийыште чоҥымо да тымарте ик ганат тӱрыснек олмыктымо огыл. Тоштемше окна ден фасад гыч идалыкын йӱштӧ пагытыштыже шуко шокшо лектеш. Электровоштыр кызытсе жаплан келшыше куатле медицине оборудований ден оргтехникым чӱкташ келшыдыме. Канализаций ден олтымо системымат уэмден олмыкташ, сантехприборымат вашталташ кӱлеш.
Поликлиникылан оптико-когерентный томографыште тылзе еда тергалтше пациент-влакын амбулаторный картыштым аралаш ешартыш кумдык кӱлеш.
Уэмдыме амбулаторный подразделений медицине организацийын у модельжылан келшен толжо манын, эмлымверым вуйлатыше-влак капремонтлан ямдылалтме икымше йыжыҥыштак Первичный медико-санитарный полышым организоватлыме регионысо рӱдерым вуйлатыше И.Ходырев дене ончыкылык пашан кугытшым аклыме йодыш дене вашлийыныт.
Поликлиникыште регистратурым, картохранилищым вашталташ, кугыеҥ ден йоча-влакым посна приниматлаш йӧным, специалист дене пураш черетым вучен шинчыме да модмо кумдыкым ышташ кӱлеш.
2021-2025 ийлаште Марий Эл здравоохраненийын первичный звеножым модернизироватлыме программым илышыш пуртымо кышкарыште 13 медицине объектым капитально олмыкташ палемдыме. РКБ-н офтальмологический отделенийже деч посна эше кандаш поликлинике ден ныл врачебный амбулаторийым уэмдат.
М.ИВАНОВА
