УВЕР ЙОГЫН

ЧАП ТЫЛАНДА, МЕДШӰЖАР-ВЛАК!

Варашрак кодын гынат, тидын нерген возыде огеш лий…

Яков Эшпай лӱмеш Марий кугыжаныш филармонийын залыштыже Медицине сестран тӱнямбал кечыжым торжественно палемдыме годым регионын тазалык аралтыш министрже Марина Панькова кокла звенон специалистше-шамычым уло шӱм-чонжо дене саламлен да нунын пациент-влакым эмлыме пашаште кугу верым налмыштым палемден. Тыгак Марий Элысе Кокла медицине пашаеҥ-влакын ассоциацийыштын медсестра-шамычлан шинчымашым келгемдаш да кумдаҥдаш йӧным ыштымыжлан тауштен.

М.Панькова Йоча республиканский клинический больницын кугурак операционный медсестраже Оксана Порошиналан, Козьмодемьянск район-влак кокласе больницын Кожваж фельдшер-акушер пунктшым вуйлатыше Ольга Егоровалан, Вӱрым налме республиканский станцийын медсестраже Маргарита Егошиналан, Шернур районысо рӱдӧ больницын Казанский врачебный амбулаторийыштыше медсестралан ыштыше Алевтина Ешпатровалан должностной обязанностьым кӱлын шуктымылан, тазалык аралтыш аланыште пашам шуко ий тыршен ыштымылан Марий Эл Тазалык аралтыш министерствын Чап грамотшым торжественно кучыктен (снимкыште).

Тазалык аралтыш министерствын дипломжо дене Всероссийский конкурсын регионысо йыжыҥыштыже сеҥыше-влакымат уло кумылын палемден:

— «Эн сай кугурак медицине сестра» номинацийыште – Республиканский онкологический диспансерын кугурак медсестраже Лариса Хохловам;

— «Эн сай лаборант» номинацийыште – Перинатальный рӱдерын генетический консультацийжын медицине лабораторный техникше Юлия Высоковаям;

— «Профессийлан ӱшанле улмылан» номинацийыште – Йошкар-Оласе городской больницын кугурак медсестраже Марина Филоновам;

— «Эн сай медицине сестра» номинацийыште – Йошкар-Оласе городской больницын операционный медсестраже Юлия Подоплеловам (1-ше вер), Республиканский клинический  больницын операционный медсестраже Юлия Фалалеевам (2-шо вер), Медведево районысо рӱдӧ больницын Лӱльпан участковый больницыжын медсестраже Лиана Сергеева ден Йоча республиканский клинический больницын медсестраже Дина Ляминам (3-шо вер);

— «Эн сай фельдшер» номинацийыште – Йошкар-Оласе йоча городской больницын 1-ше №-ан поликлиникыжын фельдшерже Наталья Михеева (1-ше вер) ден Вашкеполышым пуымо станцийын фельдшерже Гульнара Файзулинам;

— «Эн сай акушер» номинацийыште – Перинатальный рӱдерын акушеркыже-влак Ирина Чеботарева (1-ше вер) ден Лариса Козловалан (2-шо вер).

Медсестра-влакын республиканский ассоциацийыштын «Профессийлан ӱшанле улмылан» Почётан знакше ден 12 медик палемдалтын.

Пашам шуко ий тыршен ыштымылан, сестринский пашаш надырым пыштымылан Россий медсестра-влакын ассоциацийыштын таумуштшым тӱҥ медсестра-шамычлан: Елена Сусловалан (Республиканский наркологический диспансер), Светлана Шапошниковалан (Республиканский коваште-венерологический диспансер) да Полина Волковалан (Туберкулез ваштареш кучедалме республиканский диспансер) кучыктеныт.

Пайремыште тыгак кокла медицине шинчымашан специалист-влак коклаште медицине пашаеҥын профессийжылан пӧлеклалтше эн сай статьям возымо конкурсышто сеҥыше Любовь Савиновам, Россий МВД-н Марий Элысе медико-санитарный частьшын тӱҥ медсестражым, награде дене палемденыт.

Саламлыме мутым Тазалык аралтыш пашаеҥ-влакын республиканский профсоюз организацийыштын председательже Ирина Скиданат ойлен да икмыняр медсестралан чапкагаз ден таумутым кучыктен.

Пайрем республикнан сымыктыш мастарже-влакын чапле концертышт дене мучашлалтын.

А мый теве мом ешарем. Таче медсестра-влак айдеме тукымын тазалыкшым аралыме аланыште моткоч кӱлешан пашам йӱдшӧ-кечыже шуктат, сандене нунын кокла гыч кажныжым кеч таумут, кеч чапкагаз, кеч вес награде дене палемдаш лиеш… Но тиде кӱшыл орган-влакын пашашт. А  ме, пациент-влак, нуным шӱм-чон гыч лекше таумутна, пагалымына да пеҥгыде тазалыкна дене куандарен кертына.

М.ИВАНОВА

Фотом Марий Элын Тазалык аралтыш министерствыж деч налме

Опубликовать в Одноклассники

Добавить комментарий