Фотолаштык
Михаил Скобелев
«Ачалан таум каласе»
Кодшо шуматкечын Йошкар-Олаште В.Никонов лӱмеш площадьыште Ачан кечыж вашеш «Ачалан таум каласе» акций эртен.
Уремыште ояр игече шоген. Кече шыратен ончен. Ача-ава-влак икшывышт дене пырля площадь могырыш ошкылыныт. Тушто нуным поян программе вучен. Погынышо-влакым йоча вокал ансамбль-шамыч усталыкышт дене куандареныт. Мастар-влакын ярмиҥгашт пашам ыштен.
Кумылан икшыве ачажлан мотор открыткым шке кидше дене ыштен кертын. Мастарлык классым вӱдышӧ пӧлекым ямдылаш полшен. Ятыр йоча асфальтыште ача дене кылдалтше сӱретым ыштен але поро тыланымашым возен.
Мурышо группо кокла гыч «Voc_zal» коллективын ӱдыр-рвезыже-шамыч поснак ойыртемалтыныт. Нунын мастарлыкышт шукыштын кумылыштым савырен, эсогыл калык пырля муралтен, совым рӱж кырен.
Изирак йоча-шамычлан кугу курчак-влак келшеныт. Нуно йырышт пӧрдыныт, кидыштым кученыт. Кажне кумылан еҥ курчак дене пырля фотош войзалтын.
Михаил Скобелевын фотожо.
